Archives

Në Zvicër propozohet rivendosja e testit të ndërgjegjes për rekrutët që refuzojnë ushtrinë

Posted on by Alb

Shoqata Ushtarake Zvicerane kërkon rikthimin e testit të ndërgjegjes për personat që refuzojnë shërbimin ushtarak dhe zgjedhin atë civil. Sipas kryetarit të shoqatës, Stefan Holenstein, aktualisht është shumë e lehtë të shkëputesh nga ushtria dhe të kalosh në shërbim civil, duke dëmtuar përbërjen e forcave të armatosura.

Çdo vit rreth 7,000 persona zgjedhin shërbimin civil, një shifër që Shoqata Ushtarake e konsideron problem serioz për të ardhmen e ushtrisë. Holenstein paralajmëron se nëse kjo tendencë vazhdon, deri në vitin 2030 mund të ketë mungesa të theksuara të efektivit.

Nga ana tjetër, përfaqësues të shërbimit civil dhe organizata Civiva kundërshtojnë idenë e testit, duke e quajtur atë të kushtueshëm dhe të vjetëruar. Sipas tyre, shërbimi civil është një zgjedhje legjitime dhe testet e ndërgjegjes nuk do të ulin numrin e aplikimeve.

Aktualisht ushtria zvicerane ka 147,000 efektivë, më shumë se limiti ligjor prej 140,000, por qëllimi afatgjatë është ruajtja e një kapaciteti prej 100,000 ushtarësh të gatshëm në rast mobilizimi, transmeton albinfo.ch.

Ndërkohë Parlamenti zviceran po shqyrton disa ndryshime ligjore që do ta bëjnë më të vështirë kalimin në shërbimin civil, gjë që pritet të nxisë debate të mëtejshme për të drejtën e refuzimit të shërbimit ushtarak.

Për shkak të Trumpit: Zurich Pride frikësohet nga rënia e sponsorizimeve

Posted on by Alb

Festivali më i madh LGBTQI në Zvicër, Zurich Pride, pritet të zhvillohet këtë qershor me buxhet të reduktuar, për shkak të mungesës së disa sponsorëve të rëndësishëm.

Sipas bashkë-presidentit të festivalit, Ronny Tschanz, dy partnerë afatgjatë janë tërhequr nga mbështetja këtë vit, duke krijuar një mungesë prej 150,000 frangash zvicerane në buxhetin total prej 1.1 milionësh. Arsyeja kryesore është zhdukja e programeve për diversitet në shumë kompani ndërkombëtare, të cilat ndihen nën presionin e politikave të reja nga administrata e presidentit amerikan Donald Trump, transmeton albinfo.ch.

“UBS dhe Google tashmë kanë reduktuar angazhimet për diversitet. Ka frikë se edhe sponsorë të tjerë mund të tërhiqen në të ardhmen,” tha Tschanz për SRF.

Masat për të përballuar situatën

Për të përballuar këtë mungesë fondesh, organizatorët do të:

Përdorin çadra më ekonomike

Vendosin skenë më të vogël dhe më pak pajisje teknologjike

Heqin dorë nga artistët ndërkombëtarë

Ndërkohë, kostoja për sigurinë, që rritet çdo vit, vazhdon të jetë një sfidë. Festivali merr mbështetje financiare për këtë qëllim edhe nga Policia Federale Zvicerane (Fedpol).

Rradhë trafiku në Gotthard tashmë kanë filluar

Posted on by Alb

Rradha e trafikut në tunelin e Gotthard po zgjatet gjithnjë e më shumë. Aktualisht sipas Klubit Turistik të Zvicrës (TCS) në rrjetin X (ish-Twitter), kolonat e makinave shtrihen në një gjatësi prej 10 kilometrash midis Erstfeld dhe Göschenen, transmeton albinfo.ch.

Shoferët duhet të llogarisin një vonesë prej rreth 1 orë e 40 minuta. Zyra Federale e Rrugëve (FedEx) dhe Klubi Turistik i Zvicrës (TCS) parashikojnë trafik të rënduar gjatë fundjavave të festave të Ngjitjes së Krishtit dhe Rrëshajëve.

Veçanërisht të ndjeshme ndaj bllokimeve do të jenë autostradat A2 Gotthard dhe A13 San Bernardino që lidhin veriun me jugun e vendit.

Kukeli, trajner i ekipit të Zurichut U21

Posted on by BR

Ish-mesfushori i Kombëtares shqiptare, Burim Kukeli, rikthehet te klubi i Cyrihut, teksa së fundmi i është besuar drejtimi i skuadrës së 21-vjeçarëve.

Lajmi është konfirmuar nga vetë klubi zviceran, nëpërmjet një postimi në faqen zyrtare, transmeton albinfo.ch.

“Burim Kukeli do të jetë trajneri i ri i ekipit U21. 41-vjeçari luajti për klubin e qytetit nga viti 2012 deri në vitin 2017 dhe luajti 100 ndeshje zyrtare gjatë kësaj kohe. Ai e nisi karrierën e tij si trajner në vitin 2020 si ndihmës trajner te SC Kriens. Ai mbajti të njëjtën pozicion te FC Wil 1900, FC Sion dhe Grasshopper Club Zurich.

Si trajner kryesor, ai ishte në krye të ekipit U21 të GC në pranverën e vitit 2023. FCZ i uron ngrohtësisht Burim Kukelit dhe i uron fat dhe suksese”, thuhet në njoftim.

SHBA pezullon përkohësisht lëshimin e vizave për studentët, pasojat për nxënësit nga Zvicra

Posted on by Alb

Administrata e Donald Trump ka ndalur përkohësisht procedurat për lëshimin e vizave për studentët ndërkombëtarë, duke vendosur një bllokadë në programet e shkëmbimit. Kjo ka shkaktuar pasiguri të madhe te organizatat e shkëmbimit kulturor në Zvicër.

“Jam e tronditur dhe e befasuar nga ky njoftim,” thotë Lisa Drössler, drejtoreshë ekzekutive e organizatës së shkëmbimit të nxënësve AFS Switzerland. Lajmi erdhi në një moment të papërshtatshëm, pasi shumë të rinj janë në përgatitjet për qëndrimin e tyre në SHBA, transmeton albinfo.ch.

Sipas Drössler, megjithëse priste vonesa për shkak të mungesës së stafit në ambasada dhe autoritete, ajo nuk e kishte parashikuar pezullimin total të vizave. AFS është një organizatë ndërkombëtare jo-partiake dhe jo-fitimprurëse që organizon programe shkëmbimi për nxënës nga mosha 15 deri në 18 vjeç. Çdo vit, rreth 190 të rinj nga Zvicra marrin pjesë në këto programe, ndërsa këtë vit ishte planifikuar që 30 deri në 40 prej tyre të shkonin në SHBA.

Pezullimi i vizave ngre pikëpyetje për të ardhmen

Drössler thekson se shumë nga të rinjtë tashmë kanë kontaktuar organizatën për të pyetur se çfarë do të ndodhë më tej. “Tani duhet të mbledhim vetë informacion,” shton ajo, duke e përshkruar situatën si të paqartë. Nuk dihet nëse ky pezullim është i përkohshëm apo mund të zgjasë më shumë. Në skenarin më të keq, do të duhet të merren parasysh edhe vende të tjera për shkëmbim.

SHBA synon më shumë kontroll mbi studentët e huaj

Sekretari amerikan i Shtetit, Marco Rubio, ka urdhëruar ndalimin e përkohshëm të caktimit të takimeve për vizat studentore dhe ato të shkëmbimit. Qëllimi është rishikimi i mekanizmave për të verifikuar më mirë se kush po hyn në SHBA. Pjesë e këtij procesi do të jetë edhe monitorimi i mediave sociale të aplikantëve  një risi që ka ngritur shqetësime.

“Është befasuese që tani vëmendja është përqendruar te postimet në rrjetet sociale,” thotë Christine Leimgruber, drejtoreshë e organizatës ombrellë zvicerane për shkëmbimet rinore, Intermundo. Ajo këshillon që të pritet me durim gjatë ditëve në vijim, pasi vendimet e administratës Trump mund të ndryshojnë shpejt.

Studentëve u kërkohet të fshijnë rrjetet sociale

Në SHBA, disa organizata partnere po i rekomandojnë studentëve të fshijnë llogaritë e tyre në rrjetet sociale, veçanërisht ata që tashmë kanë një takim të caktuar në ambasadë. Sipas Intermundo, çdo vit janë disa qindra të rinj nga Zvicra që shkojnë në SHBA për shkollim apo kurse gjuhe të organizuara nga kompani private.

Nëse pezullimi vazhdon, planet për shumë prej tyre mund të dështojnë  dhe ëndrra për një qëndrim mësimor në SHBA do të shtyhet pa afat.

 

Rrëzimi i akullnajës në Blatten: Fshati përmbytet nga dheu, ushtria vihet në ndihmë

Posted on by Alb

Një rrëshqitje masive dheu, e shkaktuar nga rrëzimi i një akullnaje, përmbyti të martën pasdite një pjesë të konsiderueshme të fshatit Blatten në kantonin Valais. Autoritetet janë në alarm dhe po monitorojnë nga afër gjendjen e ujërave të bllokuara të lumit Lonza, për shkak të rrezikut të një rrjedhjeje të rrezikshme balte dhe mbetjesh.

Kryetari i komunës, Matthias Balmer, i emocionuar gjatë një konference për shtyp në mbrëmje, deklaroi:

“E kemi humbur fshatin, por jo zemrën.”

Ai vuri në dukje se edhe pse dëmet janë të mëdha, shpirtit i komunitetit mbetet i fortë.

Ministri i Mbrojtjes, Martin Pfister, konfirmoi se një njësi e ushtrisë është tashmë në rrugë për në Luginën e Lötschental për të ndihmuar në përballimin e situatës, përcjell albinfo.ch.

“Do të bëjmë gjithçka për të mbështetur popullatën lokale në rindërtim,” tha Pfister për SRF. Sipas tij, mundësitë e ndihmës përfshijnë transportin e ujit për të ulur nivelin e Lonza-s, garantimin e sigurisë dhe ndihmë logjistike në terren.

Korrespondentja e SRF në Valais, Anna-Lisa Achtermann, raportoi se banorët janë të tronditur dhe të pafjalë:

“Askush nuk e kishte imagjinuar që diçka e tillë mund të ndodhte këtu. Ata nuk kanë humbur vetëm shtëpitë, por edhe vendlindjen.”

Ndërkohë, autoritetet kantonale janë në kontakt të vazhdueshëm me komunat e tjera në zonë si Gampel-Bratsch dhe Steg-Hohtenn. Sipas ekspertit Raphaël Mayoraz, fshatrat më të larta si Wiler, Kippel dhe Ferden janë relativisht të mbrojtura nga rrjedhja e drejtpërdrejtë e mbetjeve, por rreziku i përmbytjeve mbetet.

Këshilltari i Shtetit, Stéphane Ganzer, njoftoi se kantoni do të ofrojë mbështetje sociale dhe ekonomike për banorët, pasi të bëhet një vlerësim i plotë i situatës në fazat në vijim.

Konferenca e radhës për shtyp pritet të mbahet nesër.

Zvicër: Edhe kamionët elektrikë do të paguajnë taksën për qarkullimin nga viti 2029

Posted on by albinfo.ch

Nga viti 2029, kamionët elektrikë në Zvicër nuk do të jenë më të përjashtuar nga taksa për qarkullimin e automjeteve të rënda të mallrave (RPLP). Këshilli Federal ka miratuar propozimin përkatës dhe e ka dërguar të mërkurën për shqyrtim në Parlament, duke shtyrë afatin e parashikuar fillimisht për vitin 2031 me dy vjet, shkruan RTS, transmeton albinfo.ch.

Qëllimi i ndryshimit ligjor është ruajtja e barazisë së kostove në transportin rrugor të mallrave dhe nxitja e kalimit të mallrave në hekurudhë. “Sistemi aktual ka arritur kufijtë e tij për shkak të zhvillimeve teknike”, tha Ministri i Transportit, Albert Rösti, gjatë një konference për mediat në Bernë.

Aktualisht, rreth 90 % e automjeteve të rënda përfitojnë nga tarifa më e ulët, ndërsa numri i kamionëve elektrikë që nuk paguajnë fare taksë është në rritje – nga rreth 600 në fund të vitit 2023 në mbi 1 000 sot. Megjithëse kjo shënon një hap pozitiv për dekarbonizimin e transportit, ajo sjell humbje në të ardhurat e shtetit dhe dobëson efektin nxitës të RPLP-së për të kaluar nga rruga në hekurudhë.

Këshilli Federal ka vendosur që ndryshimi të zbatohet në mënyrë graduale, për të mos penguar zhvillimin e flotës së gjelbër të kamionëve. Deri në vitin 2035, kamionët me energji elektrike do të përfitojnë zbritje të pjesshme në tarifë, duke u ofruar kompanive të transportit një periudhë tranzicioni dhe siguri planifikimi, transmeton albinfo.ch.

Martin von Känel, zëvendësdrejtor i Zyrës Federale të Transportit, parashikon se kjo masë do të gjenerojë rreth 300 milionë franga zvicerane të ardhura shtesë deri në vitin 2030, një rritje që llogaritet të jetë midis 5 % dhe 30 %.

Gjatë konsultimeve, disa kantone dhe shoqata mjedisore kërkuan që taksa për kamionët elektrikë të hyjë në fuqi më herët se në vitin 2031, për të mbështetur më mirë objektivat e politikës së transportit. Kjo kërkesë u mor parasysh nga Këshilli Federal, i cili tani synon një balancë mes zhvillimit teknologjik dhe sigurimit të financimit për infrastrukturën e transportit, transmeton albinfo.ch.

Rritet papunësia në Gjermani, afër nivelit më të lartë në një dekadë

Posted on by albinfo.ch

Papunësia në Gjermani ka shënuar një rritje më të madhe se sa pritej gjatë muajit maj, duke shtuar shqetësimet për gjendjen e tregut të punës në ekonominë më të madhe të Evropës, shkruan DW, transmeton albinfo.ch.

Sipas të dhënave të publikuara të mërkurën nga Agjencia Federale e Punësimit, numri i të papunëve u rrit me 34 000 në terma të rregulluar sezonalisht, duke arritur në 2.96 milionë. Ky është një nivel më i lartë se sa prisnin analistët dhe sinjalizon një ngadalësim të mëtejshëm të tregut të punës.

Në krahasim me majin e vitit të kaluar, numri i të papunëve është rritur me 197 000 persona. Ndërkohë, shkalla e papunësisë e rregulluar sezonalisht mbeti 6.3 %, por qëndron në nivelin më të lartë që nga dhjetori i 2015-ës, përjashtuar periudhën e pandemisë.

Shifrat e reja vijnë në një kohë kur papunësia në Gjermani po i afrohet pragut simbolik prej 3 milionë të papunësh për herë të parë në një dekadë.

Gjithashtu, në maj u regjistruan 634 000 vende të lira pune në Agjencinë Federale të Punësimit, një rënie prej 67 000 vendeve krahasuar me të njëjtën periudhë të vitit të kaluar, transmeton albinfo.ch.

Austria ndalon martesat nën moshën 18 vjeç dhe ato mes kushërinjve

Posted on by albinfo.ch

Qeveria federale austriake ka ndërmarrë një hap të rëndësishëm në drejtim të mbrojtjes së të miturve dhe forcimit të së drejtës familjare, duke propozuar ndalimin e martesave për personat nën 18 vjeç si dhe ndalimin e martesave midis të afërmve deri në shkallën e katërt të vijës anësore  përfshirë martesat mes kushërinjve, shkruan ORF, transmeton albinfo.ch.

Projektligji përkatës u paraqit të mërkurën nga Ministrja e Drejtësisë, Anna Sporrer (SPÖ), dhe pritet të miratohet nga Këshilli Kombëtar para pushimeve verore. Ligji do të hyjë në fuqi në gusht të vitit 2025.

“Në të ardhmen, vetëm personat që kanë mbushur moshën 18 vjeç do të lejohen të martohen ose të regjistrojnë partneritete civile,” deklaroi Sporrer para mbledhjes së kabinetit. Deri tani, ligji austriak lejonte që të miturit mbi 16 vjeç të martoheshin me miratim nga gjykata dhe kujdestari ligjor  procedurë që shpesh zbatohej pa vlerësime thelbësore të pjekurisë apo rrethanave.

Ministrja e Familjes, Claudia Plakolm (ÖVP), e përshkroi nismën si një “hap vendimtar kundër martesave të fëmijëve”, ndërsa kryetari i grupit parlamentar të NEOS, Yannick Shetty, vlerësoi iniciativën, edhe pse theksoi se rastet që do të preken janë të pakta: nga disa dhjetëra në disa qindra në të gjithë vendin, transmeton albinfo.ch.

“Një vajzë 16-vjeçare i përket shkollës, jo zyrës së gjendjes civile,” u shpreh Shetty, duke nënvizuar rëndësinë e kufizimit të martesave të hershme për të mbrojtur zhvillimin dhe të drejtat e të miturve.

Sipas Statistikave të Austrisë, numri i martesave në të cilat të paktën njëri nga partnerët ishte nën 18 vjeç ka rënë ndjeshëm gjatë dekadës së fundit  nga gati 50 raste në vitin 2015 në vetëm gjashtë raste në vitin 2024.

Projektligji gjithashtu parashikon që prokuroria do të ketë të drejtën të kërkojë anulimin e një martese ose partneriteti të regjistruar nëse njëri nga partnerët nuk ka pasur aftësinë ligjore për të hyrë në një marrëdhënie të tillë.

Kjo iniciativë qeveritare përmbyll një përpjekje të mëparshme të qeverisë ÖVP-Të Gjelbrit, e cila kishte hartuar një draft të ngjashëm por që nuk arriti të miratohej. Tashmë, me një konsensus të gjerë politik, ligji pritet të bëhet realitet në muajt e ardhshëm, transmeton albinfo.ch.

Profesioni i ri në Gjenevë

Posted on by BR

Një profesion i ri ka zënë rrënjë në Gjenevë: gardianët e parkut.

Katër janë rekrutuar me detyrën për t’u kujdesur për hapësirat e gjelbra të qytetit.

Të veshur me uniforma dalluese jeshile dhe të verdha, gardianët patrullojnë në këmbë ose me biçikletë, duke synuar të rrisin ndërgjegjësimin për mbrojtjen e parkut dhe të dekurajojnë sjelljet antisociale.

Prania e tyre shtrihet në të gjithë zonat publike, duke përfshirë zonat e Barbecue, parqet e qenve dhe pishinat, transmeton albinfo.ch.

Duke punuar në ekipe prej dy ose katër vetash, ata do të ndihmojnë gjithashtu gjatë ngjarjeve publike.

https://www.geneve.ch/actualites/gardiens-gardiennes-veiller-parcs

 

Gjermani: Kabineti miraton kufizimet e ribashkimit familjar

Posted on by albinfo.ch

Kabineti gjerman ka miratuar të mërkurën dy projektligje të reja që synojnë shtrëngimin e rregullave për migrantët, përfshirë kufizimet në ribashkimin familjar dhe rishikimin e procedurave për marrjen e shtetësisë gjermane, shkruan DW, transmeton albinfo.ch.

Sipas këtyre ndryshimeve, kufizimet do të prekin veçanërisht migrantët që gëzojnë të ashtuquajturin “status mbrojtjeje plotësuese”, një kategori që nuk përfshin statusin e plotë të refugjatit, por që u mundëson personave të qëndrojnë në Gjermani për shkak të rrezikut nga përndjekja politike në vendet e tyre të origjinës.

Projektligjet gjithashtu do të ndryshojnë rregullat për marrjen e shtetësisë gjermane me procedurë të përshpejtuar. Aktualisht, disa migrantë që konsiderohen të “integruar mirë” mund të aplikojnë për shtetësi pas tre vitesh qëndrimi në Gjermani, në vend të afatit standard prej pesë vitesh. Kjo lehtësi është propozuar të hiqet.

Dy projektligjet janë paraqitur nga Ministri i Brendshëm Alexander Dobrindt dhe do të duhet të kalojnë edhe votimin në Bundestag, dhomën e ulët të parlamentit gjerman, për t’u kthyer në ligj.

Këto masa janë pjesë e një debati më të gjerë në Gjermani për rregullimin e migracionit dhe integrimit, në një kohë kur vendi përballet me sfida të shumta në menaxhimin e numrit të madh të azilkërkuesve, transmeton albinfo.ch.

Zgjedhjet lokale në Kosovë, ky do të jetë numri asamblistëve

Posted on by albinfo.ch

Komisioni Qendror i Zgjedhjeve (KQZ) ka njoftuar numrin e ri të anëtarëve të kuvendeve komunale që do të zgjidhen në zgjedhjet lokale të vitit 2025, në përputhje me të dhënat e regjistrimit të fundit të popullsisë, realizuar në vitin 2024, raporton albinfo.ch.

Sipas Ligjit për Vetëqeverisje Lokale, numri i anëtarëve të kuvendeve komunale përcaktohet proporcionalisht me numrin e banorëve në secilën komunë, me përjashtim të Prishtinës, që ka një numër të përcaktuar prej 51 anëtarësh.

Në njoftimin e KQZ-së thuhet se ky ndryshim është pjesë e përgatitjeve për zgjedhjet lokale të këtij viti dhe bazohet në shkresën zyrtare të Ministrisë së Administrimit të Pushtetit Lokal (MAPL).

Ndryshimet kryesore:

41 anëtarë do të kenë kuvendet komunale të Prizrenit dhe Ferizajt.

35 anëtarë do të kenë kuvendet e Pejës, Gjilanit, Gjakovës dhe Podujevës.

31 anëtarë do të kenë kuvendet e Fushë-Kosovës, Mitrovicës, Lipjanit dhe Vushtrrisë.

Rritje e numrit të asamblistëve:

Fushë-Kosova: nga 27 në 31

Shtërpca: nga 15 në 19

Rënie e numrit të asamblistëve:

Deçan, Dragash, Kaçanik, Kamenicë: nga 27 në 21

Drenas, Rahovec, Suharekë, Malishevë: nga 31 në 27

Mitrovicë: nga 35 në 31

Viti: nga 34 në 27

Vushtrri: nga 35 në 31

Leposaviq, Zubin-Potok, Mitrovicë e Veriut, Junik, Zveçan: nga 19 në 15

Si pasojë e këtyre ndryshimeve, numri total i asamblistëve në të gjithë Kosovën ka rënë nga 1002 në 942.

KQZ ka bërë të ditur se këto shifra do të merren parasysh në organizimin e zgjedhjeve për Kuvende Komunale dhe Kryetarë të Komunave, që pritet të mbahen gjatë këtij viti. Ndryshimet pasqyrojnë realitetin demografik të komunave pas regjistrimit të fundit dhe synojnë përfaqësim më të drejtë dhe proporcional në qeverisjen lokale, transmeton albinfo.ch.

Tare: Kam ardhur me ide të qarta dhe me shumë entuziazëm

Posted on by BR

Igli Tare është i vetëdijshëm për atë që e pret te Milan në rolin e drejtorin sportiv.

Pas një sezoni zhgënjyes duhet që kuqezinjtë të kthehen fitues ashtu siç e kërkon emri i këtij ekipi.

“Milan është një klub që kërkon menjëherë të arrish rezultat, të fitosh dhe këtë e kam kuptuar dhe jam gati të përballem. Roli im është i rëndësishëm për strategjitë e duhura”, shprehet Tare, transmeton albinfo.ch.

Në intervistën e parë në kanalin e klubit pas emërimit, Tare tregon se puna që ka nisur do të ketë prezantimet e para që javën e ardhshme.

“Kam ardhur me ide të qarta me shumë entuziazëm, dua ta përçoj këtë në të gjithë ambientin e Milan për skuadrën dhe stafin teknik dhe të bëj punën time që ka të bëjë edhe me transferimet. Nga java e ardhshme do të vijnë dhe do të kemi mundësinë dhe t’i prezantojmë”, tha Tare.

Puna e tij do të nisë nga trajneri i ri e deri me transferimet e lojtarëve.

Igli Tare pas përvojës 15 vjeçare si drejtues te Lazio ku fitoi 6 trofe në Itali, 3 Kupa e 3 Superkupa kërkon të lejë shenjë te një klub i rëndësishëm edhe në arenën ndërkombëtare.

Sipas mediave italiane, Tare ka firmosur për 2 vite me mundësi edhe për një të tretë. Igli Tare pritet të ketë dorë të lirë dhe është një urë lidhëse mes skuadrës dhe drejtuesve të tjerë të Milan.

“Duhet ta mposhtësh Serbinë”, kryetari i Bujanocit i jep porosi kapitenit të Shqipërisë

Posted on by albinfo.ch

Kryetari i Komunës së Bujanocit, Arbër Pajaziti, ka pritur të mërkurën në kabinetin e tij kapitenin e Kombëtares Shqiptare në futboll, Berat Gjimshiti. Gjatë takimit të përzemërt, Pajaziti shprehu mirënjohje për angazhimin dhe përfaqësimin dinjitoz që Gjimshiti i bën flamurit kuqezi, duke e cilësuar atë si shembull frymëzimi për të rinjtë shqiptarë në Luginën e Preshevës dhe më gjerë, raporton albinfo.ch.

Në një moment të veçantë të takimit, Pajaziti dha edhe një porosi të qartë për mbrojtësin e Shqipërisë dhe Atalantas:

“Duhet ta mposhtësh Serbinë,” – i tha kryetari.

Gjimshiti reagoi menjëherë, duke u përgjigjur shkurt: “Me kësmet.”

Kërkesa e kryetarit u përsërit edhe një herë pas insistimit të një prej të pranishmëve në sallë, ndërsa kapiteni kuqezi shtoi: “Do Zoti.”

Takimi vjen vetëm pak ditë para përballjes së shumëpritur Shqipëri – Serbi, e cila do të zhvillohet më 7 qershor në “Arenën Kombëtare” në Tiranë, si pjesë e kualifikimeve për Kupën e Botës 2026. Kjo ndeshje pritet me interes të jashtëzakonshëm në të gjithë hapësirat shqiptare dhe konsiderohet një nga sfidat më të ndjeshme dhe me peshë të veçantë për Kombëtaren.

Pajaziti e vlerësoi praninë e Gjimshitit në Bujanoc si një mesazh të fuqishëm bashkimi dhe motivimi, duke theksuar se sporti mbetet një urë e rëndësishme për forcimin e identitetit dhe krenarisë kombëtare, transmeton albinfo.ch.

 

Ambasadori francez: Kosova vetizolohet nëse injoron miqtë ndërkombëtarë

Posted on by albinfo.ch

Ambasadori i Francës në Kosovë, Olivier Guerot, ka paralajmëruar se Kosova mund të vetizolohet nëse nuk i dëgjon miqtë ndërkombëtarë dhe nuk i përmbush angazhimet që ka marrë përsipër në proceset ndërkombëtare, raporton albinfo.ch.

Në fjalimin e tij gjatë konferencës “Kosova drejt Bashkimit Evropian: Rruga drejt një zgjidhjeje”, organizuar nga Lëvizja FOL dhe Instituti i Prishtinës për Studime Politike, ambasadori Guerot theksoi se Kosova aktualisht nuk është e izoluar, por ekziston rreziku që të izolohet përmes veprimeve të veta.

“Mesazhi i parë është: Kosova nuk është e izoluar, përveç nëse izolohet vetë. Ju nuk jeni të izoluar. Ne, pesëshja (QUINT), vendet e tjera të BE-së kemi qenë duke e mbështetur Kosovën për vite me radhë,” tha Guerot, duke rikujtuar mbështetjen e vazhdueshme të Francës, përfshirë përkrahjen për pavarësinë në vitin 2008 dhe opinionin ligjor të vitit 2009 për Gjykatën Ndërkombëtare të Drejtësisë.

Sipas tij, vetëizolimi ndodh kur Kosova nuk i dëgjon miqtë e saj ndërkombëtarë, kultivon një vetëmjaftueshmëri morale dhe shmang zbatimin e marrëveshjeve dhe zotimeve të mëparshme.

“Kosova nuk është një ishull. Ajo ndodhet në mes të një rajoni që vetë është pjesë e kontinentit. Prandaj, dëgjoni miqtë tuaj,” u shpreh ambasadori francez, raporton albinfo.ch.

Zvicër: Shembja e dheut shkatërron një pjesë të fshatit Blatten

Posted on by albinfo.ch

Një ortek i fuqishëm akulli, dheu dhe mbeturinash ka goditur mëngjesin e sotëm fshatin Blatten në luginën Lötschental të kantonit Valais në Zvicër, duke shkatërruar një pjesë të madhe të tij. Sipas autoriteteve lokale, sasia e rrëshqitur ishte më e madhja e regjistruar ndonjëherë që nga fillimi i monitorimeve në këtë zone, shkruan SRF, transmeton albinfo.ch.

Ngjarja ndodhi rreth orës 4:00 të mëngjesit, kur një masë gjigante e akullnajës Birch u shkëput dhe u rrokullis në luginë, duke përfshirë pemë, gurë dhe baltë. Edhe pse orteku ishte paralajmëruar nga autoritetet ditë më parë, përmasat e ngjarjes i kaluan pritshmëritë.

Sipas njoftimeve të para nga Komanda Rajonale dhe nga gazetarët në terren, shumë shtëpi janë shkatërruar, por për fat të mirë nuk raportohet për të lënduar. Autoritetet kishin ndërmarrë evakuime paraprake, duke shmangur një tragjedi më të madhe.

“Basenet anësore të digës mbrojtëse janë tashmë të mbushura dhe ekziston rreziku që mbeturinat të vazhdojnë të rrëshqasin drejt lumit Lonza,”  deklaroi Fernando Lehner nga Komanda Rajonale. Ai shtoi se kjo ishte një ngjarje e parashikuar, ndaj banorët u evakuuan me kohë.

Këshilli i Shtetit i Valais ka shpallur një “situatë të veçantë” për të mundësuar një reagim më të shpejtë dhe mobilizim të burimeve shtesë. Autoritetet u bëjnë thirrje qytetarëve të mos hyjnë në zonën e prekur dhe t’u përmbahen udhëzimeve zyrtare.

Pamjet nga vendngjarja tregojnë rrëshqitje masive dhe bubullima të fuqishme që dëgjoheshin në luginë. Sipas raportimeve të SRF-së, energjia elektrike u ndërpre për pak sekonda para shembjes, ndërsa një re gjigante pluhuri dhe mbeturinash mbuloi zonën, transmeton albinfo.ch.

Dy ekskavatorë janë vendosur në gatishmëri, por përdorimi i tyre në kushtet aktuale do të ishte tepër i rrezikshëm. Prandaj, autoritetet po shqyrtojnë mundësinë e përdorimit të mjeteve me telekomandë për të menaxhuar situatën në terren.

Në një njoftim të dërguar përmes aplikacionit të komunitetit, autoritetet lokale konfirmuan se “e paimagjinueshmja ka ndodhur” dhe se një pjesë e konsiderueshme e fshatit është goditur.

Shtabi i Komandës së Lötschental ka njoftuar një konferencë për media në orën 19:00, ku pritet të jepen të dhëna të detajuara për dëmet, gjendjen aktuale dhe hapat e mëtejshëm që do të ndërmerren për përballimin e krizës, transmeton albinfo.ch.

Lojtari i Baselit për Shaqirin: “Ka një aurë të pakrahasueshme”

Posted on by albinfo.ch

Në një intervistë për emisionin e futbollit Heimspiel në blue Sport, mbrojtësi i majtë i FC Basel, Dominik Schmid, ka folur me superlativa për ndikimin e Xherdan Shaqirit brenda dhe jashtë fushës, duke e quajtur atë një figurë me “aurë të jashtëzakonshme” që i motivon të gjithë në skuadër, transmeton albinfo.ch.

Shaqiri, i cili magjepsi Superligën zvicerane këtë sezon me 39 gola në 34 ndeshje, duke e udhëhequr Bazelin drejt titullit kampion, vazhdon të jetë figura qendrore e skuadrës jo vetëm me paraqitjet e tij në fushë, por edhe me ndikimin në dhomën e zhveshjes.

“Është normale që kur ke cilësi nga Shaqiri dhe ai jep rezultate në një mënyrë të tillë që askush të mos turpërohet të bëjë më shumë për të. Edhe pse ai punon edhe në fazën mbrojtëse, të gjithë të tjerët japin një ose dy përqind më shumë”, tha Schmid, duke vënë në pah respektin dhe përkushtimin që ylli shqiptar ngjall tek bashkëlojtarët, transmeton albinfo.ch.

Ai shtoi se Shaqiri nuk është vetëm lider teknik, por edhe emocional. “Ai ka një prani të jashtëzakonshme, një aurë që është e pakrahasueshme. Kjo na shtyn të gjithëve të japim edhe më shumë. Ai kërkon shumë, jo vetëm nga skuadra, por edhe nga trajneri dhe stafi. Dhe mendoj se edhe ne kishim nevojë për këtë”.

Ndikimi i Shaqirit shkon përtej fushës së blertë. I pyetur për jetën e Shaqirit jashtë fushës, Schmid zbuloi se “Personaliteti i Shaqit në Zvicër është aq i madh, sa nuk mund të shkojë kudo pa vënë kapuçin dhe kapelen”.

Megjithatë, ylli i Bazelit mbetet shumë i qasshëm dhe i përulur. “Ai është gjithmonë shumë i shoqërueshëm dhe komunikues. Gjithmonë ke ndjesinë se ai vërtet gjen kohë për ty, s’ka rëndësi nëse je lojtar, anëtar i stafit, trajner, kuzhinier apo pastrues. Ai është gjithmonë shumë i këndshëm”.

Shaqiri, që u rikthye në futbollin zviceran pas një karriere të pasur ndërkombëtare, duket se po e jeton një prej fazave më të fuqishme të karrierës së tij, si në aspektin sportiv, ashtu edhe në atë njerëzor, transmeton albinfo.ch.

Kosovë: Të enjten protestojnë bizneset, do bllokojnë hyrjet e Prishtinës

Posted on by albinfo.ch

Të enjten, më 29 maj, nga ora 10:00 deri në 12:00, hyrjet kryesore të Prishtinës do të bllokohen për dy orë nga automjetet e bizneseve, si shenjë proteste ndaj liberalizimit të tregut të energjisë elektrike, që pritet të hyjë në fuqi më 1 qershor, raporton albinfo.ch.

Kjo protestë është iniciuar nga Oda Ekonomike e Kosovës, e cila ka kërkuar shtyrjen e hyrjes në treg të lirë dhe nisjen e një dialogu të hapur me institucionet për të gjetur një zgjidhje që do të ndikonte sa më pak në sektorin privat.

Lokacionet e bllokimit:

Hyrja nga Veterniku / Gjilani  -Bllokimi do të ndodhë nga Albi Mall e poshtë Veternikut, duke ndaluar qasjen nga Ferizaj, Gjilan dhe Aeroporti.

Hyrja nga Fushë-Kosova / Mitrovica – Bllokimi do të bëhet në rrethin e madh te Lakrishtja (afër Dukagjini Tower), duke ndalur lëvizjen nga këto dy drejtime.

Hyrja nga Podujeva / Lagjja e Vranjevcit – Bllokimi do të bëhet te ish-Humanisti, në udhëkryqin afër bankës Raiffeisen, duke ndalur qarkullimin nga Podujeva si dhe lëvizjet nga Dragodani në drejtim të Shkabaj dhe Orlloviq.

Sipas Odës Ekonomike, kompanitë pjesëmarrëse në protestë janë ndër ato që preken drejtpërdrejt nga vendimi për daljen në treg të lirë të konsumatorëve të mëdhenj  me qarkullim mbi 10 milionë euro ose me mbi 50 punëtorë. Në mungesë të një sqarimi nga Zyra e Rregullatorit të Energjisë për ndikimin konkret në tarifa, Oda ka ngritur shqetësimin se ofertat në tregun e hapur janë deri në 200% më të larta.

Oda ka paralajmëruar se në rast se nuk ka reagim institucional dhe nuk plotësohen kërkesat, protestat do të ashpërsohen me bllokime deri në 4 orë dhe mund të përshkallëzohen në protesta ditore, të vazhdueshme.

“Në mungesë të reagimit institucional: protesta do të vazhdojë çdo ditë, gjatë gjithë ditës, deri në reflektim dhe veprim konkret nga institucionet përgjegjëse,” thuhet në njoftimin zyrtar, transmeton albinfo.ch.

Zelensky për vizitë në Berlin, pritet nga kancelari Merz

Posted on by Drin Reçica

Sot, presidenti ukrainas Volodymyr Zelensky është pritur nga nikoqiri, kancelari Friedrich Merz gjatë një vizite zyrtare në Gjermani, përcjell albinfo.ch.

Ndërkohë Merz është zotuar të marrë një rol më udhëheqës në sigurimin e mbështetjes për Ukrainën sesa paraardhësi i tij socialdemokrat, Olaf Scholz.

Ai vizitoi Ukrainën me udhëheqës të tjerë evropianë pak ditë pasi u bë kancelar dhe të hënën mbështeti të drejtën e Ukrainës për të nisur sulme me raketa me rreze të gjatë veprimi në territorin rus  ndryshe nga retorika e kujdesshme e Scholz për këtë çështje.

Presidenti ukrainas është atje duke kërkuar të sigurojë mbështetjen nga një prej aleatëve kryesorë evropianë të vendit të tij dhe ndihmë të mëtejshme ushtarake, ndërsa bisedimet e paqes ngecin, zhgënjimi i Donald Trump me mungesën e progresit rritet dhe Rusia rrit bombardimet e saj.

Gjermania ka qenë furnizuesi i dytë më i madh i ndihmës ushtarake për Ukrainën pas SHBA-së.

Rohde: Urgjentisht të formohen institucionet

Posted on by Drin Reçica

Edhe ambasadori i Gjermanisë në Kosovë, Jorn Rohde ka thënë se Kosova urgjentisht duhet të formojë institucionet dhe se politikanët duhet të vendosin shtetin të parin, përcjell albinfo.ch.

Pas dështimit për herë të 22-të të konstituimit të Kuvendit, Rohde në një deklaratë për KosovaPress ka thënë se ngërçi po ndikon negativisht në perceptimin e Kosovës nga jashtë.

Rohde ka thënë se mungesa e institucioneve funksionale jo vetëm që ndikon në proceset e brendshme të vendimmarrjes, por gjithashtu pengon Kosovën të përfitojë nga iniciativat ndërkombëtare, siç është Plani i Rritjes i Bashkimit Evropian.

“E përshkruan fjala, është ngërç, është ndalesë. E thashë javën e kaluar, i bën njerëzit apatik dhe gjëja e fundit që i nevojitet një demokracie të gjallëruar është bllokada. Njerëzit kanë kryer punën e tyre me 9 shkurt dhe politikanët duhet të vendosin shtetin të parin, ndërsa politikën e partisë të dytën. Pra, mendoj se nevojitet urgjentisht që Kosova të formojë institucionet. Por, nuk është puna ime të bëjë punën e politikanëve, unë mund vetëm të observoj, por mund të të them për siguri se nuk rrit imazhin e Kosovës jashtë vendit. Nëse nuk ke një institucion funksional është e vështirë të bësh detyrat e shtëpisë, sepse nuk ke fuqinë e prokurës të marrësh vendime të vështira, të cilat nevojiten tani. Pavarësisht se a janë paratë e Planit të Rritjes të BE-së, të cilat janë në pritje për shkak se Kuvendi i Kosovës nuk është funksional, pra nuk mund të ratifikosh marrëveshjen”, ka thënë Rohde.

Rohde ka deklaruar se bllokada në Kuvend vjen si pasojë e moskompromisit mes partive politike.

“Thjeshtë nuk kemi kompromisin që nevojitet mes palëve politike… Nuk jam këtu që të jap nota. Unë mund të them se në politikë ka nevojë për kompromis dhe pasi që unë jam ambasadori gjerman sigurisht që mund të marrë parasysh shtetin tim. Ne patëm zgjedhje të vështira, rezultate të vështira, por njerëzit bënë kompromis sepse ata vendosën shtetin të parë. Ne i patëm zgjedhjet dy javë pas Kosovës dhe tani kemi një parlament funksional që një muaj dhe shpresoj që Kosova ndjek hapin me neve së shpejti”, ka deklaruar Rohde.

Të martën deputetët dështuan të konstituojnë Kuvendin edhe në përpjekjen e 22-të. As në tentimin e radhës, Lëvizja Vetëvendosje në koalicion me Guxo dhe Alternativa, nuk arriti të formojë Komisionin për votimin e fshehtë të kryeparlamentarit.

Sa shpikëse janë kompanitë zvicerane?

Posted on by Drin Reçica

Shumë kompani zvicerane janë në zhvillim e sipër, përcjell albinfo.ch.

Një juri e njohur, e udhëhequr nga ish-këshilltarja federale Doris Leuthard, zgjedh inovacionin më premtues në Zvicër nga një mori idesh premtëse. Në edicionin 2024/25, kompania me seli në Bernë, New Roots, mbizotëroi: ajo prodhon alternativa të djathit nga qumështi me bazë bimore. Mendimi inovativ dhe suksesi ekonomik e bindën jurinë.

Kompanitë që konkurrojnë për çmimin e Biznesit të Gjelbër 25/26 u njoftuan së fundmi.

Janë nominuar gjithsej 37 kompani. “Jam vazhdimisht i impresionuar nga mënyra se si shumë kompani në Zvicër e kanë njohur qëndrueshmërinë si një model biznesi dhe po bëjnë një ndryshim të vërtetë me zgjidhje inovative”, thotë Cédric Habermacher, drejtor i Green Business Zvicër.

https://www.blick.ch/green-circle/so-erfinderisch-sind-unsere-unternehmen-die-besten-ideen-aus-der-schweiz-id20895131.html

Nxënësit e Aargaut nuk do të lejohen të përdorin telefonin gjatë orës së mësimit

Posted on by Drin Reçica

Nxënësit e kantonit Aargau nuk do të lejohen të përdorin telefonin gjatë orës së mësimit, ka vendosur Qeveria e Aargaut, transmeton albinfo.ch

Nga 1 gushti, nxënësit në shkollat fillore të kantonit Aargau nuk do të lejohen të përdorin pajisje elektronike personale gjatë orës së mësimit. Qeveria e Aargaut ka vendosur këtë kufizim në të gjithë kantonin.

Pajisjet nuk do të lejohen jo vetëm gjatë mësimeve, por edhe gjatë pushimeve e në aktivitete shkollore, ekskursione e udhëtime. Ora e drekës dhe udhëtimi për në shkollë nuk preken.

Qeveria e Aargaut justifikon vendimin me arsyetimin se pajisjet mund të prishin mësimet dhe të dëmtojnë shkëmbimin personal. Përveç kësaj, ato mund të sjellin rreziqe si ngacmimi kibernetik dhe të kenë ndikim negativ në shëndetin mendor të fëmijëve e të rinjve.