Archives

The Sun: Vizitoni plazhet mahnitëse përgjatë Rivierës Shqiptare

Posted on by Drin Reçica

Plazhet me rërë të bardhë dhe ujërat kristalore të Shqipërisë  të konsideruara nga ekspertët e udhëtimit si “Maldivet e Evropës”  janë vetëm pak orë larg Britanisë së Madhe, shkruan Cyann Fielding në një artikull të botuar në të përditshmen britanike “The Sun”, përcjell albinfo.ch.

“Wizz Air” po lançon fluturime direkte nga Aeroporti “Gatwick” i Londrës për në Tiranë,  kryeqytetin e Shqipërisë  për vetëm 19,99 paund.

Ndërsa Tirana është një destinacion pushimesh më vete, shumica e turistëve e përdorin atë si bazë për të udhëtuar në Rivierën Shqiptare.

Tirana është kryeqyteti i Shqipërisë dhe shtëpia e shumë bunkerëve.

Larg qytetit, mund të eksploroni vendpushime të tjera të vendit, të cilat e kanë bërë destinacionin evropian të quhet “Maldivet e Evropës”.

Përgjatë vijës bregdetare të vendit ka ujëra të pastra kristalore, plazhe me rërë të bardhë dhe bukuri natyrore.

Ka edhe shumë bare plazhi për të eksploruar, të cilat shpesh shërbejnë kuzhinë tipike mesdhetare.

Për shembull, në qytetin e Sarandës, i cili është i vendosur midis detit Jon dhe kodrave të valëzuara, ndodhet hoteli “Lost Seaside”.

Këtu, vizitorët mund të shijojnë restorantin, pishinën, plazhin me rërë dhe ujërat e pastra kristalore  duke përfshirë shezlongje që varen mbi det dhe pishinë.

Në të njëjtin vend, ju mund të kaloni ditën në kasolle mbi ujë të stilit “Maldive”.

Çmimet në Shqipëri janë zakonisht shumë të lira. Ju mund të merrni një krikëll birrë për vetëm 250 lekë (2,22 paund) ose një gotë verë për 200-400 lekë (1,78- 3,55 paund).

Ushqimi është gjithashtu i lirë, një vakt mesatar me tre pjata për dy persona kushton rreth 4500 lekë (39,94 paund).

“Çmimi mesatar i një dhome dyshe në Shqipëri është 83 paund nata”, sipas “Kayak”.

“Me Shqipërinë që po njihet gjithnjë e më shumë si “Maldivet e Evropës”, fluturimet do t’u mundësojnë turistëve të zbulojnë destinacione të pashfrytëzuara në të gjithë Evropën Juglindore”,  tha Yvonne Moynihan, drejtoreshë menaxhuese në “Wizz Air UK”.

Një gazetar i “The Sun” vizitoi së fundmi, Shqipërinë për të parë nëse vendi i vogël evropian ofronte pushime cilësore në plazh dhe me një buxhet të kufizuar.

“Shqipëria është shndërruar në një destinacion të preferuar për turistët që kërkojnë pushime me diell dhe të përballueshme.

Duke fluturuar nga Aeroporti “Gatwick” i Londrës, po shpresoja për pushime të lira dhe të gëzueshme, dhe pikërisht këtë mora.

Çmimet e ulëta ishin një surprizë e këndshme. Në qytetin e Vlorës, koktejet kushtonin vetëm 3,70 paund.

Një pjatë me linguine me prodhime deti kushtonte vetëm 5,20 paund, dhe një drekë e plotë në plazhin e Ksamilit kushtonte vetëm 11,30 paund.

Qëndrova kryesisht në “Airbnb”, të cilat varionin nga 14-21 paund për person në natë.

Ujërat mahnitëse përgjatë vijës bregdetare shqiptare ishin ngjyrë bruz  të ngjashme me detet që gjenden në Korfuz apo Sardenjë.

Plazhet ishin gjithashtu të qeta, falë zonës që ishte ende një perlë e pazbuluar.

E qetë, piktoreske dhe perfekte për turistët me buxhet të kufizuar, Shqipëria është vendi ideal për pushime.

Është një perlë e fshehur që ofron vlera të jashtëzakonshme pa bërë kompromis me bukurinë”. 

Pse Mira Murati refuzoi ofertën miliarda dollarë nga Zuckerbergu?

Posted on by Drin Reçica

Një përplasje e pazakontë në kulmin e garës për talentin më të mirë në fushën e inteligjencës artificiale, përcjell albinfo.ch.

Themeluesja e Thinking Machines Lab dhe ish-CTO e OpenAI, Mira Murati, ka konfirmuar për revistën Wired se asnjë prej anëtarëve të ekipit të saj nuk ka pranuar ofertën miliardëshe të Mark Zuckerberg për t’u bashkuar me laboratorin e ri të Meta-s, të quajtur “Superintelligence Lab”.

Sipas raportit, Meta u përpoq të rekrutojë anëtarë të ekipit të Muratit duke ofruar kompensime nga 200 milionë deri në 1 miliard dollarë për çdo individ, shifra që tronditën industrinë. Por, Murati deklaron se: “Derimë tani, asnjë person nga Thinking Machines Lab nuk ka pranuar ofertën”, duke nënvizuar vendosmërinë e ekipit për të ruajtur pavarësinë.

Nga ana tjetër, Meta ka mohuar këtë version të ngjarjeve. Zëdhënësi Andy Stone tha për Wired se kompania kishte bërë oferta vetëm për një numër të kufizuar personash dhe shtoi se detajet financiare të raportuara janë të pasakta. “Në fund të ditës, mbetet pyetja: kush po e krijon këtë narrativë dhe pse?”, deklaroi Stone. Thinking Machines Lab, startup-i i themeluar nga Murati, ka siguruar financim me vlerë mbi një miliard dollarë pa lançuar ende një produkt, duke u kthyer në një nga kompanitë më të ndjekura në sektorin e AI.

Burime nga industria thonë se vizioni afatgjatë dhe drejtimi i fortë i Muratit janë arsyeja që ekipi qëndron i bashkuar, pavarësisht ofertave të paprecedenta nga korporatat më të mëdha teknologjike.

Ekspertët theksojnë se studiuesit e këtij laboratori zgjedhin të punojnë të lirë nga kufizimet e strukturave gjigante, me qëllimin për të ndërtuar të ardhmen e inteligjencës artificiale nga e para.

Përjashtohet talenti shqiptar Edon Zhegrova nga Lille

Posted on by Drin Reçica

Lajmi ka bërë bujë. Anësor Edon Zhegrova është përjashtuar nga ekipi i parë i Lille. Sulmuesi i Kosovës po stërvitet momentalisht me rezervat e ekipit francez, sipas asaj që raporton “Le Petit Lillois”, përcjell albinfo.ch.

Ky vendim i papritur dhe drastik ka ardhur pas dëshirës që shqiptari ka shprehur për t’u larguar.

Kujtojmë se 26-vjeçari është shumë pranë largimit, teksa Napoli po e ndjek këmba-këmbës.

Kështu, deri në gjetjen e një strehe të re, Zhegrova do të vazhdojë të jetë jashtë skuadrës së Lille. Vlen të përmendet se shqiptari ka edhe 1 vit kontratë me Lille dhe për të mos e humbur me parametra zero, francezët janë “pro” shitjes së tij.

Zyrtari amerikan i Mbrojtjes në Kosovë, gjatë ditës pritet në takim nga Osmani

Posted on by Drin Reçica

Presidentja Vjosa Osmani sot do të pres në takim Zëvendësndihmës Sekretarin e Mbrojtjes të Shteteve të Bashkuara të Amerikës, David A. Baker, përcjell albinfo.ch.

Sipas njoftimit të lëshuar për media, takimi do të zhvillohet nga ora 15:00 në Kabinetin e Presidencës.

Po ashtu u bë e ditur se mediat mund të marrin pamje në fillim të takimit.

Ndërsa, nga ora 16:00 zëvendës ndihmës Sekretarin e Mbrojtjes të Shteteve të Bashkuara të Amerikës, David A. Baker do të pritet nga ministri në detyrë i Mbrojtjes, Ejup Maqedonci.

Ndryshe, Baker arriti të premten në Kosovë, në vizitën e parë të tij në vendin tonë, dhe u prit nga e ngarkuara me punë e misionit diplomatik të Amerikës në Kosovë, Anu Prattipati.

Mërgimtari nga Zvicra i ofron 20 euro ryshfet policit në “Sunny Hill”, arrestohet

Posted on by Drin Reçica

Shqiptari me shtetësi zvicerane është arrestuar të premten në Bërrnicë të Poshtme, gjegjësisht në festivalin “Sunny Hill”, pasi dyshohet se i kishte ofruar 20 euro ryshfet një zyrtari policor, përcjell albinfo.ch.

Megjithëse, i njëjti, pas aktit është arrestuar dhe dërguar në mbajtje.

Fsh. Bërrnicë e Poshtme, Prishtinë  01.08.2025, 16:20. Është arrestuar i dyshuari mashkull me shtetësi zvicerane pasi që i njëjti i kishte dhënë zyrtarit policor para në vlerë 20 euro. Me vendim të prokurorit pas intervistimit i dyshuari është dërguar në mbajtje”, thuhet në njoftimin e policisë.

Deputetja ukrainase kërkon që shteti i saj ta njohë Kosovën

Posted on by Drin Reçica

“Falënderojmë Shqipërinë për mbështetjen. Së bashku do të arrijmë objektivat për të qenë pjesë e BE”.

Së fundmi, deputetja ukrainase Ivanna Klympush Tsintsadze në një intervistë në Klan News deklaroi se Ukraina do të njohë Kosovën në të ardhmen e afërt, duke vënë në dukje se kjo çështje nuk do të mbetet më e hapur dhe vendimi për njohjen e Kosovës pritet të merret së shpejti, përcjell albinfo.ch.

Ajo shprehu besimin e plotë se ky vendim do të jetë në përputhje me pritshmëritë e popullit të Kosovës.

“Unë besoj se në të ardhmen e afërt Ukraina do ta njohë Kosovën. Nuk do të jetë më një çështje e hapur. Besoj se Ukraina do ta marrë vendimin e duhur që pritet nga populli në Kosovë.”

Gjithashtu, Klympush Tsintsadze falenderoi thellësisht qytetarët e Shqipërisë për mbështetjen e tyre të jashtëzakonshme ndaj Ukrainës në këtë periudhë sfiduese, duke theksuar se ata janë në “anën e duhur të historisë”. Deputetja nënvizoi edhe rolin e shtetit shqiptar dhe koordinimin e ngushtë që ekziston mes dy vendeve në arenën ndërkombëtare, si në aspektin politik ashtu edhe në atë ushtarak dhe humanitar.

“Unë jam shumë mirënjohëse për ndihmën që kanë dhënë qytetarët e Shqipërisë, ata janë në anën e duhur të historisë. Jam shumë mirënjohëse për gjithë mbështetjen që ata kanë dhënë deri tani, edhe shteti shqiptar nëpër organizata të ndryshme ndërkombëtare. Ne kemi koordinuar veprimet tona me shtetin shqiptar në aspektin politik dhe kemi ndërtuar një besim tek mbështetja e tyre është shumë e rëndësishme për ne. Edhe për mbështetjen ushtarake kemi mirënjohës, edhe për mbështetje ushtarake jemi shumë mirënjohës.”

Ajo shprehu gjithashtu shpresën që Shqipëria do të vazhdojë të ofrojë mbështetje të fuqishme për Ukrainën në rrugën e saj drejt anëtarësimit në NATO dhe integrimit në Bashkimin Evropian, duke nënvizuar se bashkë do të arrijnë të gjitha objektivat strategjike.

“Ne kemi arritur disa marrëveshje me Shqipërinë për çështjet e sigurisë në vitet e ardhshme, mendoj se kjo do të jetë një çështje që do të vijojë të zbatohet. Po ashtu ju vlerësojmë edhe për ndihmën humanitare që kanë dhënë njerëzit në Shqipëri. Shpresojmë që Shqipëria do të vijojë me këtë mbështetje për Ukrainën që të bëhet shtet anëtar i NATO-s dh së bashku ne do të arrijmë të gjitha objektivat për qenë pjesë e Bashkimit Europain.”

2 orë pritje në pikën kufitare Dheu i Bardhë

Posted on by Drin Reçica

Qendra Kombëtare për Menaxhim Kufitar ka përditësuar të dhënat, duke bërë të ditur se pritjet më të gjata të mërgimtarëve për të hyrë në Kosovë vijojnë deri në 120 minuta në hyrje të pikës kufitare Dheu i Bardhë, shkruan albinfo.ch.

Ndërkohë në pikën kufitare, Merdarë, Jarinje, dhe Muçibabë pritjet për hyrje jane 15 minuta, derisa pikat tjera kufitare kanë fluks edhe më të ulët të pritjeve. / Albinfo.ch

Dua Lipa elektrizon atmosferën në “Sunny Hill”: Ngjitet në skenë me babanë e saj

Posted on by albinfo.ch

Dua Lipa ka elektrizuar atmosferën duke u ngjitur në skenën e festivalit “Sunny Hill”, kësaj radhe me të atin, Dukagjin Lipën, një këngëtar i njohur roku.

Kënga e njohur “Era”, e grupit “Gjurmët” një këngë kult në muzikën tonë, i ka bërë bashkë babë e bijë, me të cilët ka kënduar e gjithë masa prej rreth tridhjetë mijë vetash, të pranishëm në festival.

Ministri në detyrë i Kulturës, Rinisë dhe Sportit, Hajrulla Çeku ka postuar në rrjetet sociale një video nga ky spektakël, të cilin e ka shoqëruar me fjalët: “Ku ka më mirë se në shtëpi. Dua jonë në Prishtinë”.

Festivali “Sunny Hill” ka vendosur Prishtinën dhe Kosovën në hartat botërore të muzikës së popullarizuar.

https://www.rtklive.com/sq/news-single.php?ID=700955

 

Fjalime më 1 gusht në të gjithë vendin

Posted on by albinfo.ch

Është në traditën e shënimit të festës kryesore kombëtare të Zvicrës, që 7 këshilltarët federalë (ministrat) të mbajnë fjalime në sa më shumë vende dhe regjione të Zvicrës. Prandaj edhe këtë vit, anëtarët e Këshillit Federal kanë zhvilluar një “Tour de Suisse” të vërtetë të premten për të shënuar festën kombëtare, 1 Gushtin. Disa prej tyre madje kanë vizituar më shumë se një vend dhe kanë mbajtur më shumë se nga një fjalim.

Presidentja Federale Karin Keller-Sutter ka folur në Rütli. Ministri i Jashtëm Ignazio Cassis ka mbajtur fjalimin e tij të 1 gushtit në Gersau/SZ. Ministri i Mbrojtjes Martin Pfister ka folur në Amriswil dhe Fribourg, ndër të tjera. Ministri i Drejtësisë Beat Jans ka vizituar Schaffhausenin, Altdorfin dhe Windischin, vende këto në të cilat ka mbajtur edhe fjalimet përkatëse të festës.

Këshilltari Federal Albert Rösti ka vizituar madje katër kantone, Ministrja e Brendshme Elisabeth Baume-Schneider ka mbajtur fjalime në kantonet e Fribourg dhe Ticino. Dhe Guy Parmelin është ndalur në kantonet e Solothurn dhe Graubünden.

Keller-Sutter Shpreh Zhgënjim

Presidentja Federale Karin Keller-Sutter komentoi mbi vendimin e tarifave të SHBA-së në prag të festimeve të 1 gushtit. Këshilli Federal është i zhgënjyer, është shprehur Keller-Sutter.

Ajo ka vazhduar: “Ne negociuam një marrëveshje që e miratuam në fillim të korrikut. Kjo marrëveshje u mbështet gjithashtu nga anëtarët e kabinetit të administratës Trump. Megjithatë, me sa duket, as ata nuk morën mbështetjen e presidentit”.

Por Keller-Sutter nuk dëshiron të dorëzohet. Zvicra ka përjetuar tashmë shumë stuhi dhe tani është koha për t’u ngritur dhe për të punuar.

Anëtarë të tjerë të Këshillit Federal mbajtën gjithashtu fjalime më 1 gusht. Beat Jans (SP) tha se “një porcion Zvicër” do t’i bënte mirë botës. Ishte bashkëpunimi që e bëri Zvicrën të fortë, jo veprimi më vete.

Lidhur me situatën globale, Albert Rösti (SVP) tha se ritmi i përshkallëzimeve ndonjëherë është aq i lartë sa është e vështirë të mbash ritmin. Elisabeth Baume-Schneider (SP) solli në kujtesë nevojën për interesim për rajonet e tjera gjuhësore. Vetëm atëherë Zvicra mund të funksionojë në planin afatgjatë.

Martin Pfister (Qendër) shprehu besim në lidhje me tarifat e SHBA-së: Ai ishte i sigurt se një zgjidhje për këtë çështje do të gjendej me SHBA-në.

Pas 12 vitesh në arrati dënohet kosovari, “legjendë e vjedhjeve me thyerje”

Posted on by albinfo.ch

Një 64-vjeçar kosovar duhej të dëshmonte para Gjykatës së Qarkut Zofingen për grabitje që datojnë më shumë se dhjetë vjet më parë. Ai fajësoi bashkëpunëtorin e tij për të gjithë fajin, transmeton albinfo.ch.

Abi* dyshohet se ka kryer sulme me grabitje në zonën e Zofingenit në vitin 2012 dhe 2013 me mikun e tij Blerimin* (Emra fiktivë). Mënyra e tyre e veprimit ishte gjithmonë e njëjtë: Abi ishte shoferi dhe e çonte Blerimin në shtëpitë që ata kishin zbuluar. Blerimi më pas hapte një vrimë në kornizat e dritareve dhe dyerve dhe i hapte pastaj dritaret me një tel. Ai kontrollonte ndërtesën për para dhe sende me vlerë.

Pas krimit, Abi merrte Blerimin dhe të dy – ndonjëherë me një bashkëpunëtor të tretë – ndanin plaçkën midis tyre. Ata akuzohen se kanë vjedhur mallra me vlerë 84,920 franga zvicerane.

Prokuroria Publike e Kantonit të Aargaut e akuzon Abin për vjedhje masive dhe në lidhje bandash, shkruan Aargauer Zeitung. Megjithatë, gjykimi është vonuar për një kohë të gjatë sepse i akuzuari ishte në arrati. Veprat penale si Hyrja pa leje dhe dëmtimi i pronës që lidhen me vjedhjet me thyerjet janë tashmë të parashkruara (të vjetruara).
Autoritetet më në fund arritën ta arrestonin Abin në Kroaci. Ai ndodhej në paraburgim në Lenzburg që nga vjeshta e kaluar sepse ekzistonte rreziku që të arratisej.

Prokuroria Publike ka kërkuar për të një dënim me burg me kusht prej një viti për vjedhjet, me afat për tre vjet. Përveç kësaj, iu caktua një gjobë prej 4,000 frangash zvicerane, ose 40 ditë burgim si kompensim. Abi pritet gjithashtu të përballojë shpenzimet ligjore.
Abi u paraqit në gjykatë i veshur me një xhaketë sportive dhe i shoqëruar nga dy zyrtarë policie. Gjatë seancës dëgjimore, ai ishte i shqetësuar dhe përpiqej t’i shmangej pyetjeve të gjyqtarit. Abi i shmangej pyetjeve dhe u përgjigjej me kundërpyetje të zemëruara, përcjell albinfo.ch. Gjykatësi u detyrua ta ndërpriste dhe ta qortonte disa herë.

Abi në fund u dorëzua. Megjithatë, ai këmbënguli se këtu kishte vetëm një fajtor: Blerimi kishte komplotuar kundër tij sepse besonte se Abi i kishte borxh 20,000 euro. Kjo ishte e vetmja arsye pse ai ishte në gjykatë.
“Për mua, hajdutët janë njerëzit më të ulët. Unë kurrë nuk do të shoqërohesha me dikë të tillë, dhe sigurisht që nuk do të vidhja vetë! Absolutisht jo!” thirri Abi.

Blerimi ishte akuzuar dhe qe dënuar për vjedhjet, vite më parë. Gjatë gjyqit kundër tij, ai kishte dëshmuar disa herë kundër Abi-t, duke e akuzuar atë si një “legjendë të shpimit të dritareve”.

Megjithatë, mbrojtja e Abi-t shprehu dyshime për besueshmërinë e Blerimit. Deklaratat e tij kundërshtonin njëra-tjetrën. Për më tepër, Blerimi ishte pjesërisht i dehur kur kishte dëshmuar dhe kishte arsye për të dëmtuar Abin për shkak të 20,000 eurove që pretendonte se i detyrohej.

Mbrojtja gjithashtu i konsideroi provat e tjera kundër Abit – kontaktet telefonike midis tij dhe Blerimit – si të pabaza. Prandaj, ata kërkuan që Abi të lirohej nga akuzat “in dubio pro reo” (në rast dyshimi, për të akuzuarin). Mbrojtja gjithashtu i referoi paditësit privatë, viktimat e vjedhjeve, në gjykatat civile, transmeton albinfo.ch. Ajo ka kërkuar që shpenzimet ligjore dhe të mbrojtjes të paguhen nga thesari i shtetit.

Edhe gjatë shpalljes së vendimit, nuk pati qetësi në sallën e gjyqit. Gjyqtari i vetëm e shpalli Abin fajtor për vjedhje tregtare dhe banditeske – ai u përpoq të ndërpriste dhe të vazhdonte diskutimin. Por pa sukses.

Kryetari i trupit gjykues vendosi një dënim me burgim me kusht prej një viti me një periudhë prove dyvjeçare. Ai gjithashtu vendosi një gjobë lidhëse prej 2,000 frangash zvicerane. Siç sugjeroi mbrojtja, ai i referoi viktimat në procedura civile. Abi do të bartë shpenzimet ligjore dhe të mbrojtjes.

“Nuk është për t’u habitur që deklaratat e Blerimit ndryshojnë në disa aspekte,” shpjegoi gjykatësi: “Gjatë gjyqit të tij, ai është përpjekur të minimizonte veprat penale në mënyrë që të mos inkriminonte veten. Në një moment të mëvonshëm, ai ishte në gjendje t’i përshkruante krimet në mënyrë më dramatike.”, transmeton albinfo.ch. Telefonatat e dokumentuara gjithashtu korrespondonin me deklaratat. Prandaj, ai nuk kishte dyshime për fajësinë e Abit.

“Të ardhurat shtesë nga vjedhjet të erdhën në ndihmë, veçanërisht pasi ende kishe persona në varësi për të mbështetur,” tha Thomas Meier.
Ndërkohë, Abi tundi kokën, duke e fshehur më në fund në duar. Megjithatë, kishte disa lajme të mira për të: ai do të lirohej nga paraburgimi të nesërmen.

Megjithatë, sa kohë do të jetë në gjendje Abi të gëzojë lirinë e tij është një pyetje tjetër. Një kërkesë për ekstradim në Serbi e pret atë. Edhe atje, ai pritet të përgjigjet për krimet e kryera me Blerimin.

Cilat janë rregullat e reja të Schengenit dhe a preket edhe Kosova

Posted on by albinfo.ch
Në vend të vulave fizike në pasaporta, do të hyjë në përdorim sistemi i ri digjital për regjistrimin e hyrjeve dhe daljeve të shtetasve nga vendet joanëtare të BE-së.

Bashkimi Evropian, Duke filluar nga tetori i këtij viti, do të nisë zbatimin e një sistemi të ri të hyrjes dhe daljes për qytetarët që nuk janë nga vendet e Unionit duke filluar nga data 12 tetor.

Ky sistem i avancuar, i njohur si EES – Entry/Exit System – do të regjistrojë të dhënat biometrike të udhëtarëve, përfshirë gjurmët e gishtërinjve dhe imazhin e fytyrës. Sipas asaj që raporton “The Guardian”, sistemi do të: Zëvendësojë vulosjen manuale të pasaportave; Regjistrojë datën dhe kohën e hyrjes dhe daljes; Kapë të dhëna biometrike si gjurmët e gishtërinjve dhe imazhin e fytyrës (vetëm njëra nga këto); Llogarisë automatikisht kohëzgjatjen e qëndrimit të lejuar; Sinjalizojë shtetet anëtare në rastet e qëndrimeve të tejzgjatura, shkruan telegrafi.com.

Këto rregulla do të prekin edhe shtetasit e vendeve të Ballkanit Perëndimor: Kosova, Shqipëria, Maqedonia e Veriut, Bosnje dhe Hercegovina, Mali i Zi dhe Serbia, të cilët aktualisht gëzojnë regjim pa viza për hyrje të shkurtër në zonën Shengen.

Sistemi i ri, do të zëvendësojë vulosjen manuale të pasaportave dhe do tu mundësojë autoriteteve kufitare të kontrollojnë automatikisht kohëzgjatjen e qëndrimit të lejuar për turistët dhe udhëtarët e biznesit.

Sistemi do të nisë së zbatuari gradualisht për gjashtë muaj dhe pritet të hyjë në funksionim të plotë në janar të vitit 2026.

Makineritë për marrjen e gjurmëve të gishtërinjve tashmë janë vendosur në disa pika kalimi, përfshirë terminalin Eurostar në Londër dhe Portin e Doverit.

Komisioni Evropian thotë se ky sistem do të rrisë sigurinë kufitare dhe do të përshpejtojë procesin për udhëtarët e rregullt.

Rreth 25,000m3 rrëzim shkëmbinjsh të regjistruar në fshatin zviceran Brienz

Posted on by erezzaademi

Më shumë shkëmbinj janë shkëputur në fshatin zviceran lindor Brienz sesa supozohej fillimisht pas reshjeve të fundjavës së kaluar, tha një raport i ri i situatës i publikuar nga bashkia e Albula të premten.

Sipas raportit, rreth 25,000 metra kub shkëmb u shkëputën nga pjesa e përparme pranë Caltgeras dhe ranë në shpatin e shkëmbinjve. Kjo bëri që ajo të përshpejtohej ndjeshëm.

Fillimisht, ishte folur për rreth 10,000 metra kub rënie shkëmbinjsh. Shifra është rregulluar që atëherë në bazë të fluturimeve me dronë, tha Christian Gartmann nga stafi i menaxhimit të bashkisë për agjencinë e lajmeve Keystone-SDA.

Sipas autoriteteve, të gjitha lëvizjet e tjera në zonat e pjerrëta janë përshpejtuar ditët e fundit. Megjithatë, ato tani po ulen pak. Në zonën e fshatit, lëvizjet mbeten në një trend në rënie. Ato aktualisht janë rreth 0.6 metra në vit, transmeton albinfo.ch.

Parashikimet thonë se reshjet në të ardhmen e afërt do të çojnë përsëri në përshpejtime dhe ndoshta në rënie të mëtejshme shkëmbinjsh në shpatin e shkëmbinjve. Prandaj, situata e rrezikut konsiderohet ende e lartë.

Në fillim të javës u njoftua se ekspertët kishin rekomanduar përgatitjen e fazës së ardhshme “blu”. Kjo fazë përfshin mbylljen e të gjitha rrugëve përreth trafikut. Puna përgatitore për këtë filloi të hënën. Fshati u evakuua nëntorin e kaluar.

Bashkëpunim Gjermani-Shqipëri: Goditet banda e mashtruesve telefonikë

Posted on by albinfo.ch

Hetuesit në Gjermani dhe Shqipëri i kanë dhënë një goditje një bande mashtruesish telefonikë. Disa urdhër-arreste u ekzekutuan të enjten në kryeqytetin e Shqipërisë, Tiranë, kundër gjashtë të dyshuarve që drejtonin një qendër thirrjesh atje, njoftoi të premten në Stuttgart Zyra e Policisë Kriminale të Shtetit Baden-Württemberg, transmeton albinfo.ch

Të dyshuarit janë pesë burra dhe një grua midis moshës 21 dhe 36 vjeç. Ata thuhet se kanë mashtruar disa viktima në Gjermani dhe Austri me një total prej gati 400,000 eurosh gjatë një periudhe prej gjashtë muajsh përmes telefonatave mashtruese, shkruan spiegel.de.

Të enjten, autoritetet e sigurisë dhe zyrtarët e Zyrës së Policisë Kriminale të Shtetit ekzekutuan urdhër-arreste dhe banesat.

Vetëm pak ditë më parë, dy gjermanë u arrestuan në Poloni për drejtimin e një qendre telefonike atje dhe gjithashtu për fitimin e parave përmes telefonatave tronditëse.

Gjykata e BE-së, kundër kampeve italiane në Shqipëri: Meloni i mohon kompetencën

Posted on by albinfo.ch

Të premten, gjykata më e lartë e Evropës ka vënë në dyshim ligjshmërinë e listës së “vendeve të sigurta të origjinës” të përdorur nga Italia për të dërguar migrantë në Shqipëri dhe për të përpunuar kërkesat e tyre për azil në një procedurë të përshpejtuar. Kjo është një pengesë e re për një komponent qendror të politikës së migracionit të qeverisë italiane.

Vendimi i Gjykatës Evropiane të Drejtësisë (GJED) për vendet e sigurta të origjinës, që u mor sot, është një zhgënjim i hidhur për qeverinë italiane. Kryeministrja Meloni kaloi në ofensivë pas vendimit, duke sulmuar gjykatën. Opozita në Itali ndërkaq, mund të gëzohet: Vendimi i Luksemburgut e bën më të vështirë për qeverinë italiane të vazhdojë të ndërpresë rrugëtimin e azilkërkuesve në det dhe t’i sjellë ata në Shqipëri.

Opozita është ankuar prej kohësh për kostot: projekti i Shqipërisë pritet të kushtojë qindra miliona euro në vitet e para. Dhe kjo për kampet që po qëndrojnë kryesisht të zbrazëta që nga hapja e tyre.

Meloni dëshiron të shpëtojë “modelin e saj të Shqipërisë”

Meloni sulmon gjykatën. Qeveria italiane, e cila ka konceptuar “Projektin shqiptar”, ka lëshuar vetëm deklarata me shkrim pas vendimit. Kryeministrja Meloni, e cila gjithmonë kishte theksuar se kampet në Shqipëri do të funksiononin, shprehu habi. Kryeministrja menjëherë ka mohuar juridiksionin e GJED-së mbi këtë çështje: Gjyqësori “po pretendonte përsëri” kompetenca “që nuk i përkasin, ndërsa përgjegjësia në fakt u takon politikanëve”, sipas saj.

Meloni njoftoi se do të vazhdonte të kërkonte zgjidhje dhe iu referua paketës së Komisionit Evropian për migracionin dhe azilin. Kjo mund të sjellë rregulla të reja që vitin e ardhshëm dhe ta bëjë një pjesë të vendimit të sotëm të parëndësishme.

Vendimi i GJED, një sinjal edhe për shtetet e tjera të BE-së

Megjithatë, deri atëherë, pengesat për shpalljen e një vendi si vend i sigurt origjine do të jenë rritur me siguri. Modeli me kampet shqiptare nuk po funksionon siç është planifikuar. Shumë politikanë në Evropë i kishin ndjekur përpjekjet e Italisë me simpati. Jo më larg se në maj, kancelari Friedrich Merz ishte shprehur për të si për një iniciativë të mirë, “të cilën ne e mbështesim edhe në Gjermani”.

 

Trump urdhëron dy nëndetëse bërthamore të lëvizin afër Rusisë

Posted on by albinfo.ch

Presidenti i SHBA-së, Donald Trump, ka njoftuar se i ka urdhëruar dy nëndetëse bërthamore të lëvizin në rajonet afër Rusisë, si reagim ndaj kërcënimeve që bëri ish-presidenti i Rusisë, Dmitry Medvedev. 

Në një postim në “Truth Social”, Trump, i ka quajtur deklaratat e Medvedevit shumë provokuese.

“Kam urdhëruar dy nëndetëse bërthamore të pozicionohen në rajonet e duhura, në rast se këto deklarata budallallëqe dhe nxitëse janë më shumë se kaq”, ka shkruar Trump.

Medvedev, që aktualisht është zëvendëskryetar i Këshillit të Sigurisë të Rusisë, ka paralajmëruar Trumpin të enjten që të mbajë në mend se Moska ka aftësi të nukleare të kohës ish-Sovjetike si zgjidhje të fundit.

Këto janë pasojat e vendimit të tarifave të SHBA-së ndaj Zvicrës

Posted on by erezzaademi

Presidenti i SHBA-së, Donald Trump, ka njoftuar se do të vendosë tarifa prej 39 përqind për importet nga Zvicra duke filluar nga 7 gushti. Redaktorja e biznesit e SRF, Camilla Herrmann, shpjegon se çfarë do të thotë kjo për industrinë zvicerane të eksportit dhe kë do të godasin veçanërisht rëndë tarifat.

Çfarë do të thotë kjo tarifë për industrinë zvicerane?

Në muajt e fundit, kompanitë vendase kanë qenë të detyruara të pranojnë tarifa shtesë prej 10 përqind. Disa kompani raportuan se kjo tashmë ka arritur limitin. Shoku nga tarifat e reja është përkatësisht i madh. 39 përqind do të vendosë një barrë të madhe mbi industrinë vendase të eksportit. Importuesit amerikanë, të cilët në fund të fundit paguajnë tarifat, mund t’ua kalojnë një pjesë të barrës klientëve përmes çmimeve më të larta. Por produktet zvicerane do të bëhen më pak tërheqëse. Kompanitë amerikane ka të ngjarë të përpiqen të ulin çmimet e prodhuesve zviceranë ose, nëse është e mundur, të kalojnë te furnizues më të lirë. Për disa kompani, tarifat e kësaj madhësie mund të kërcënojnë vetë ekzistencën e tyre, transmeton albinfo.ch.

Cilët sektorë janë veçanërisht të ekspozuar?

Industria e orëve mund të goditet rëndë. Këto kompani vështirë se mund t’i shmangin tarifat sepse prodhimi në Zvicër është një tipar kyç. Megjithatë, konsumatorët amerikanë mund të reagojnë duke blerë orë zvicerane jashtë vendit në vend që të blejnë në SHBA. Prodhuesit e makinerive dhe instrumenteve precize, si dhe industria ushqimore zvicerane, janë gjithashtu të prekshme. Mbetet e paqartë se çfarë do të zbatohet për industrinë kimike dhe farmaceutike. Produktet farmaceutike janë përjashtuar nga tarifat për dekada për shkak të një rregulloreje të OBT-së. Trump ka treguar vazhdimisht se tarifat për produktet farmaceutike janë vetëm çështje kohe. Nuk ka shumë që industria mund të bëjë. Mundësia e ngritjes ose zgjerimit të prodhimit jashtë vendit do të ishte një propozim i rrezikshëm. Nga njëra anë, kjo është e kushtueshme dhe ka kuptim vetëm për kompanitë më të mëdha; nga ana tjetër, do të shoqërohej me pasiguri të madhe, sepse është e paqartë nëse dhe për sa kohë këto tarifa do të mbeten në fuqi, shkruan SRF.

Si krahasohet Zvicra me BE-në?

Bashkimi Evropian ka rënë dakord me Shtetet e Bashkuara për tarifa reciproke prej 15 përqind. Industria evropiane ka qenë në krizë për njëfarë kohe dhe ka të ngjarë të vuajë më tej si rezultat. Zvicra tani është penalizuar dyfish nga norma e tarifës disproporcionalisht më e lartë. Produktet zvicerane që konkurrojnë drejtpërdrejt me produktet nga BE-ja do të jenë në një disavantazh të konsiderueshëm konkurrues në Shtetet e Bashkuara në të ardhmen. Megjithatë, Zvicra preket edhe indirekt nga tarifat e BE-së, pasi kompanitë zvicerane furnizojnë një numër të madh produktesh të ndërmjetme në BE, të cilat përpunohen më tej atje dhe më pas eksportohen në Shtetet e Bashkuara. Tarifat konsiderohen toksike për ekonominë; ato pengojnë rritjen ekonomike dhe ulin konsumin.

A funksionon llogaritja për SHBA-në?

Për muaj të tërë, Donald Trump ka folur për miliarda dollarë tarifa që SHBA-të do të mbledhin çdo ditë. Këshilltari i tij, Peter Navarro, vlerësoi se shifra është 700 miliardë dollarë. Por edhe pse tarifat i ngarkojnë industritë e huaja, importuesit amerikanë duhet t’i paguajnë këto tarifa. Dhe ata tashmë po e ndiejnë ndikimin. Prodhuesi amerikan i makinave Ford lëshoi së fundmi një paralajmërim për fitimin, duke thënë se tarifat do të arrinin deri në 2 miliardë dollarë këtë vit. General Motors gjithashtu pret kosto shtesë prej 1.1 miliardë dollarësh këtë vit.

SHBA do të prodhojë raketa për aleatët e saj me vlerë deri në 3.5 miliardë dollarë

Posted on by erezzaademi

Departamenti i Mbrojtjes i Shteteve të Bashkuara të Amerikës ka nënshkruar një kontratë me kompaninë e teknologjisë mbrojtëse Raytheon për prodhimin e raketave të avancuara ajër-ajër me rreze mesatare të njohura si AMRAAM (Advanced Medium Range Air-to-Air Missile).

Përveç prodhimit të raketave, marrëveshja përfshin sistemet që përdoren për ndjekjen dhe analizimin e fluturimit të raketave, pjesë këmbimi dhe mbështetje teknike për vendet partnere.

Kontrata, që mund të arrijë një vlerë deri në 3.5 miliardë dollarë, është pjesë e përpjekjeve të vazhdueshme amerikane për të forcuar aftësitë mbrojtëse të aleatëve dhe partnerëve të saj përballë sfidave të sigurisë globale, në veçanti për rastin në Ukrainë dhe rritjes së tensioneve në rajone të tjera, transmeton albinfo.ch.

Përfituesit e kësaj kontrate përfshijnë një sërë vendesh aleate: Ukrainën, Lituaninë, Izraelin, Poloninë, Finlandën, Gjermaninë, Japoninë, si dhe disa shtete të tjera që nuk janë përmendur konkretisht në njoftim.

Sipas Pentagonit, prodhimi dhe dërgimi i këtyre raketave dhe komponentëve shtesë pritet të përfundojë deri në tremujorin e tretë të vitit 2031, duke treguar një angazhim afatgjatë të SHBA-së për sigurinë e partnerëve të saj strategjikë në mbarë botën.

Ndalimi i fishekzjarrëve në të gjithë Zvicrën nga 1 gushti, ja çfarë duhet të dini

Posted on by erezzaademi

Arsyet për ndalimin: Fishekzjarrët me zë të lartë kanë shumë kundërshtarë; qentë dhe macet dridhen dhe drodhen, kafshët e fermave si viçat reagojnë me shqetësim. Ambientalistët kritikojnë ndotjen e tokës dhe ajrit. Dhe njerëzit e ndjeshëm ndaj zhurmës duhet të vuajnë ose të ikin në zona më të qeta. Në vitet e fundit, gjithnjë e më shumë komuna kanë shtrënguar rregulloret e tyre të fishekzjarrëve. Një publicist dhe trajner qensh nga Aargau tani dëshiron të ndalojë fishekzjarrët për individët privatë në të gjithë Zvicrën.

Ndalimi kombëtar: Roman Huber nga Aargau thotë se ka një lidhje të mrekullueshme me kafshët dhe njerëzit e ndjeshëm. Për t’i mbrojtur ata nga fishekzjarrët me zhurmë, ai ka nisur një iniciativë popullore. Qëllimi i tij: “Dua që shpërthimet e rastësishme dhe të panevojshme të ndalohen”. Për ta arritur këtë, të gjitha fishekzjarrët me zhurmë nuk do të lejohen më të ndizen. Shitja e fishekzjarrëve gjithashtu do të ndalohet. Kantonet, si përjashtim, mund të lejojnë shfaqje të mëdha dhe të orkestruara të fishekzjarrëve me interes mbi-rajonal, transmeton albinfo.ch.

Ndalimi i panevojshëm për Këshillin Federal: Qeveria federale hedh poshtë iniciativën popullore të Roman Huber dhe nuk ka ndërmend të paraqesë një kundërpropozim. Këshilli Federal është i vetëdijshëm se fishekzjarrët me zhurmë perceptohen si shqetësuese nga disa anëtarë të popullsisë. Ato gjithashtu mund të shkaktojnë reaksione tek kafshët. Megjithatë, kushtetuta nuk ka nevojë të ndryshohet për këtë, pasi kantonet dhe komunat mund të kufizojnë vetë fishekzjarrët. Për më tepër, shumë njerëz kënaqen duke ndezur fishekzjarrë. Për këto arsye, Këshilli Federal e konsideron një ndalim në të gjithë Zvicrën as proporcional dhe as të domosdoshëm, shkruan SRF.

Parlamenti kërkon kompromis: Komisionet përgatitore përkatëse me sa duket kanë frikë se iniciativa mund të pritet mirë nga publiku pa një kundërpropozim. Dy sondazhe tregojnë se një shumicë e qartë e të anketuarve do të donin të mbështesnin iniciativën e fishekzjarrëve. Prandaj, komitetet duan ta dobësojnë pak ndalimin e propozuar. Kjo duhet të bëhet në nivel legjislativ, jo në kushtetutë. Një përkufizim më i saktë i kundërpropozimit indirekt pritet të fillojë nga mesi i gushtit. Për fishekzjarrët, për shembull, duhet të formulohet një rregullore specifike.

Rreth 360,000 të papunë në Austri në korrik

Posted on by erezzaademi

Në korrik, 359,374 persona në Austri ishin ose të papunë ose të regjistruar në një program trajnimi AMS (Shërbimi Publik i Punësimit), që përfaqëson një rritje prej 17,605 kërkuesish pune krahasuar me korrikun e vitit të kaluar – një rritje prej pesë pikë e dy përqind. Shkalla e papunësisë ishte gjashtë pikë e shtatë përqind, duke u rritur me 0.3 pikë përqindjeje nga viti në vit, sipas Ministrisë së Çështjeve Sociale të premten. Numri i individëve të papunë afatgjatë u rrit me nëntë pikë e tetë përqind.

Papunësia tek gratë u rrit me gjashtë pikë e tetë përqind, ndërsa tek burrat u rrit me katër pikë e tre përqind. Papunësia tek të rinjtë u rrit me tre pikë e shtatë përqind. Numri i kërkuesve të praktikës që ishin menjëherë të disponueshëm për punë u rrit ndjeshëm me shtatë pikë e tre përqind. Midis shtetasve të huaj, papunësia u rrit me pesë pikë e tre përqind, dhe midis qytetarëve austriakë, u rrit me pesë pikë e pesë përqind.

Ministria e Çështjeve Sociale shqyrtoi gjithashtu zhvillimin e kontratave të shërbimit të pavarur, të cilat vazhduan të rriteshin. Në qershor 2025, u regjistruan rreth 15,200 kontrata të pavarura të siguruara plotësisht – një rritje prej tre pikë nëntë përqind krahasuar me qershorin 2024. Përveç kësaj, u regjistruan afërsisht 26,900 kontrata të pavarura margjinale, një rritje prej gjashtë pikë pesë përqind.

Rritja ishte veçanërisht e theksuar tek burrat. “Me një rritje prej shtatë pikë dy përqind, rritja e kontratave të pavarura me sigurim të plotë në qershor ishte dukshëm më e lartë se për gratë, numri i të cilave mbeti pothuajse i pandryshuar me një rritje prej 0.2 përqind”, deklaroi ministria, transmeton theinternational. Rreth një në pesë kontrata shërbimesh të pavarura ishin në sektorin e shëndetësisë dhe kujdesit social, të ndjekura nga arsimi dhe shërbimet shkencore/teknike.

Një zhvillim i habitshëm u pa në sektorin e “shërbimeve të tjera postare, korrierit dhe ekspres”, i cili përfshin shërbimet e shpërndarjes së ushqimit. Krahasuar me qershorin 2024, numri i kontratave të pavarura në këtë sektor u rrit më shumë se katërfish, shkruan albinfo.at.

Më pak vende pune

Statistikat e Austrisë gjithashtu publikuan të dhënat e tregut të punës të premten. Në tremujorin e dytë të vitit 2025, kompanitë austriake raportuan 147,900 vende pune të hapura, sipas një ankete tremujore me mostër. Kjo shënon një rënie prej katër përqind nga tremujori i mëparshëm dhe është tremujori i pestë radhazi në të cilin vendet e lira të punës kanë rënë.

Kosovë: Arrestohen tre persona, keqpërdorën kartelat bankare të të tjerëve

Posted on by erezzaademi

Tre persona janë arrestuar nga Policia e Kosovës gjatë operacionit nën dyshimet për përfshirje të disa personave të dyshuar në kryerje të veprave penale si “Lëshim i çeqeve pa mbulesë ose të rreme dhe keqpërdorim i kartelave të bankës apo të kreditit”, “Vjedhje e identitetit dhe kredencialeve” dhe “Hyrja e paautorizuar kompjuterike”.

Operacioni policor ka ndodhur në rajonin e Prishtinës, ku fillimisht janë arrestuar dy persona, të cilët dyshohet se në bashkëveprim kanë përdorur kartela të bardha bankare (bllanko), si dhe kanë shpërndarë video përmes rrjeteve të ndryshme sociale duke tërhequr para në bankomate të ndryshme, si dhe kanë përdorur disa faqe në rrjete sociale për të promovuar këto lloj kartelash, transmeton albinfo.ch.

Sipas njoftimit, policia ka sekuestruar dy kompjuterë; një llaptop; dy telefona mobil; tri USB; një HDD.

“Të dyshuarit me qëllim të përfitimit të kundërligjshëm të dobisë pasurore për vete apo për personin tjetër, dyshohet se kanë keqpërdorur kartela bankare të personave të ndryshëm, kësisoj me vendim të prokurorit, dy të arrestuarit janë ndaluar për 48 orë”, thuhet në njoftim.

Bëhet e ditur se nga hetimet e mëtejme, më 1 gusht u arrestua edhe i dyshuari i tretë, i cili dyshohet se ka qenë pjesë e grupit të personave të tjerë dhe i cili po ashtu me vendim të prokurorit është dërguar në mbajtje.

SHBA-ja i vendos afat Novartis dhe firmave të tjera farmaceutike për të ulur çmimet

Posted on by erezzaademi

Presidenti i SHBA-së, Donald Trump, thotë se u ka dërguar letra 17 kompanive të mëdha farmaceutike,  përfshirë gjigantin zviceran Novartis – duke kërkuar masa të menjëhershme për të ulur çmimet e barnave në Shtetet e Bashkuara. Përndryshe, ato do të përballen me masa hakmarrëse.

Në letrat drejtuar personalisht drejtorëve ekzekutivë të kompanive, Trump u dha firmave një afat prej 60 ditësh. “Ai ka nënshkruar 17 letra drejtuar kompanive farmaceutike”, tha zëdhënësja e Shtëpisë së Bardhë, Karoline Leavitt, për shtypin në Uashington të enjten, duke lexuar letrën drejtuar drejtorit ekzekutiv të Eli Lilly, David Ricks, si shembull.

Trump më pas i publikoi të gjitha letrat në platformën e tij Truth Social. Përveç Novartis, ato iu dërguan edhe Merck, Pfizer, AstraZeneca, Novo Nordisk dhe Sanofi, ndër të tjera, transmeton albinfo.ch.

“Ne po e shqyrtojmë letrën”, shkroi Novartis në përgjigje të një kërkese nga agjencia e lajmeve AWP. Roche tha gjithashtu se po e shqyrtonte letrën që Trump kishte publikuar në mediat sociale.

“Nëse refuzoni të veproni, ne do të përdorim të gjitha mjetet në dispozicionin tonë për të mbrojtur familjet amerikane nga çmimet e tepërta të barnave”, thuhej në letrat kryesisht identike, shkruan swissinfo. Kompanitë kanë afat deri më 29 shtator për të paraqitur “angazhime konkrete”.

Më 12 maj, Trump kishte njoftuar tashmë një plan për të ulur ndjeshëm çmimet e barnave në SHBA, deri në nivelin e ekonomive të tjera të mëdha. Ai nuk kishte arritur ta mbante këtë premtim të fushatës gjatë mandatit të tij të parë.

“Çmimet e disa barnave me recetë dhe produkteve farmaceutike do të bien me 50 deri në 80 ose 90% për amerikanët pothuajse menjëherë”, premtoi Trump në atë kohë. Instrumenti kryesor për këtë do të ishin negociatat me kompanitë farmaceutike, të cilat kishin rezistuar uljeve të çmimeve në të kaluarën.

Aksionet farmaceutike janë nën presion

Çmimet e barnave në SHBA janë ndër më të lartat në botë dhe janë dukshëm më të larta se çmimet në vendet fqinje dhe në Evropë. Sipas një studimi nga Korporata Rand, amerikanët paguajnë mesatarisht 2.5 herë më shumë për barnat me recetë sesa evropianët, për shembull. Trump kishte njoftuar qëllimin e tij për të zvogëluar këtë hendek.

Pasi disa aksione farmaceutike në SHBA u vunë nën presion të enjten, shumë aksione evropiane tani po bien gjithashtu. Ndër humbësit më të mëdhenj, me rënie prej më shumë se 4% në disa raste, janë aksione të tilla si Novo Nordisk, AstraZeneca, GSK dhe Merck. Dy kompanitë e mëdha zvicerane Novartis dhe Roche nuk do të jenë në gjendje të reagojnë deri të hënën, pasi tregu i aksioneve është i mbyllur të premten për shkak të festës kombëtare.

Shoqata e industrisë Interpharma e shqetësuar

Analisti David Seigerman nga BMO Capital Markets foli për “tituj tronditës”, por shprehu dyshime nëse kërkesat mund të zbatohen lehtësisht. Ka pengesa ligjore këtu. Richard Vosser nga JPMorgan bëri një vlerësim të ngjashëm.

Ndërkohë, strategu i investimeve Jurus Arthur nga Oddo BHF vlerëson se Novartis, e cila është shumë e varur nga tregu amerikan, mund të humbasë deri në 800 milionë dollarë (650 milionë CHF) në vit, dhe Roche deri në 1 miliard CHF.

Sipas shoqatës së industrisë Interpharma, qeveria amerikane po rrezikon furnizimin global me ilaçe inovative. “Kjo ndikon gjithashtu në kompanitë farmaceutike të bazuara në kërkime në Zvicër dhe furnizimin me ilaçe në Zvicër”, tha shoqata në një deklaratë.

Ku është problemi me pagesat për mbrojtjen në Hagë?

Posted on by erezzaademi

Ministria e Drejtësisë në Kosovë ka thënë më 24 korrik se i ka ndarë në total rreth 33 milionë euro për mbrojtjen e të akuzuarve për krimet e supozuara të luftës në Kosovë, në procesin gjyqësor që zhvillon Gjykata Speciale në Hagë.

Më konkretisht, Gjykata i heton krimet e pretenduara të pjesëtarëve të Ushtrisë Çlirimtare të Kosovës (UÇK) kundër pakicave etnike dhe rivalëve politikë, që nga janari i vitit 1998 deri në dhjetor të vitit 2000.

Kjo gjykatë – me gjykatës dhe prokurorë ndërkombëtarë – është e themeluar me ligje të Kosovës në vitin 2015, por funksionon në Holandë.

Ajo financohet kryesisht nga Bashkimi Evropian, me kontribute shtesë nga disa shtete të tjera, si Shtetet e Bashkuara, Kanadaja, Norvegjia, Zvicra dhe Turqia. Në dy vjetët e fundit ajo e ka pasur një buxhet prej rreth 100 milionë eurosh.

Shpenzimet për ekipet mbrojtëse të të pandehurve i kryen kryesisht shteti i Kosovës.

Pavarësisht deklaratave të ministrisë, Organizata e Veteranëve të Luftës e Ushtrisë Çlirimtare të Kosovës (OVL e UÇK-së) ka thënë se e konsideron të turpshme vendosjen e “çmimeve tavan” për tarifat ndaj ekipeve mbrojtëse në Hagë dhe ka kërkuar heqjen e menjëhershme të tyre.

Rasti kryesor në Hagë po zhvillohet kundër ish-krerëve të UÇK-së, përkatësisht ndaj ish-presidentit Hashim Thaçi, ish-kryeparlamentarëve Kadri Veseli dhe Jakup Krasniqi dhe ish-deputetit të Kosovës, Rexhep Selimi.

Ata akuzohen për krime lufte dhe krime kundër njerëzimit, të cilat i kanë hedhur poshtë të katërtit.

Në dhjetor të vitit 2024, ndaj Thaçit është ngritur edhe një aktakuzë e dytë për pengim të drejtësisë.

Për çfarë “çmimesh tavan” bëhet fjalë?

Sipas një udhëzimi administrativ të vitit 2024, Ministria e Drejtësisë i ka kategorizuar pagesat për avokatët mbrojtës me arsyetimin se “sistemi i pagesave duhet të kontribuojë në ruajtjen e një ekuilibri midis burimeve dhe mjeteve të të akuzuarit, në këtë rast shtetit të Kosovës”.

Sipas këtij kategorizimi, shteti i Kosovës ndan deri në 110.000 euro në muaj për një avokat në fazën e gjykimit.

Ministrja në detyrë e Drejtësisë, Albulena Haxhiu, ka thënë në një intervistë për Radiotelevizionin Dukagjini, më 28 korrik, se në kategorinë e katërt  më të rëndën  bëjnë pjesë Thaçi, Veseli, Krasniqi dhe Selimi.

“Ajo që kemi bërë është që, duke parë se kemi pasur disa raste për pengim të drejtësisë, e kemi bërë ndryshimin përmes udhëzimit administrativ që të mos jetë dikush me mbështetje financiare të njëjtë sikurse ata që përballen me këto akuza (krime lufte), sepse nuk është e njëjta”.

Sipas udhëzimit të ri administrativ, nëse dikush në Gjykatën Speciale gjykohet për vepra penale, të cilat nuk kanë të bëjnë me krimet për të cilat është themeluar ajo, përfshirë: pengimin e drejtësisë, shkeljen e urdhrave të gjykatës, apo shkeljeve tjera, atëherë shteti ofron deri në 5.000 euro në muaj për mbrojtjen.

“Kjo është bërë për ta dekurajuar këdo që ta dëmtojë këtë proces. Unë, personalisht, besoj që rastet e fundit më shumë i dëmtojnë ata, sesa që u ndihmojnë”, ka deklaruar Haxhiu.

A duhet të ketë kategorizime?

Amer Alija, hulumtues ligjor në Fondin për të Drejtën Humanitare në Kosovë, i ka thënë Radios Evropa e Lirë se duhet të ketë limite në shumën që ndan shteti për mbrojtje.

“Nuk mund të shpenzohen pa limit resurset shtetërore”, ka thënë shkurt ai.

Ehat Miftaraj, drejtor ekzekutiv i Institutit të Kosovës për Drejtësi ka thënë se shteti i Kosovës nuk duhet fajësuar për shumën e pagesave që bën në rastet që lidhen me pengim të drejtësisë, por që duhet të sigurojë mbrojtje efektive dhe të mos i kursejë mjetet kur bëhet fjalë për rastet e krimeve të luftës.

“Qeveria do të duhej ta kishte një vizion shumë më të qartë dhe ta shihte mbrojtjen e të pandehurve si mbrojtje për vetë shtetin e Kosovës. Shteti do të duhej të analizonte, ta bënte një vlerësim se çfarë fiton Republika e Kosovës dhe sa është interesi i Republikës së Kosovës për mbrojtjen e luftës së UÇK-së dhe mbrojtjen e katër të pandehurve kryesorë në Hagë”.

Sipas tij, procesi gjyqësor tani është në “periudhë kritike” për shkak të thirrjes së dëshmitarëve të profilit të lartë në Hagë dhe angazhimit të madh të mbrojtjes, prandaj mund të ketë shpenzime më të mëdha.

Në gusht të vitit të kaluar, Fondacioni “Përkrahje për mbrojtjen juridike të Hashim Thaçit”, u pati nisur letër krerëve të shtetit, duke iu kërkuar rritje të fondeve për nevojat e mbrojtjes juridike të ish-krerëve të UÇK-së, sepse në të kundërtën rrezikohej largimi i avokatëve kryesorë.

Por, sipas Miftarajt, “avokatët e kanë ditur qartë se sa do të jenë tarifat dhe sa do të zgjasë procesi”.

“Problemi është te fakti që të pandehurit në Hagë, përveç ndihmës shtetërore, e kanë pasur Fondacionin që i ka mbështetur financiarisht, dhe të pandehurit ndoshta kanë pritur mbështetje më të madhe nga qytetarët, dhe kur kjo s’ka qenë e mjaftueshme, kanë mbetur mbrapa me pagesa për avokatë”.

Radio Evropa e Lirë nuk ka arritur të marrë një përgjigje nga mbrojtja, nëse pretendimet për largimet eventuale janë të vërteta. As Ministria e Drejtësisë nuk është përgjigjur në kërkesën e REL-it për më shumë hollësi rreth pagesave.

Gjykata Speciale është formuar jashtë shtetit, pas presionit të bashkësisë ndërkombëtare, për të garantuar proces gjyqësor të paanshëm. Droja nga mundësia e frikësimit të dëshmitarëve është një tjetër arsye pse gjykata e ka selinë në Holandë dhe jo në Kosovë.

Deputetë të Kuvendit të Kosovës kanë tentuar ta shpërbejnë atë më 2017, por pa sukses./REL