Çmimet e naftës në nivelin më të lartë në pesë muajt e fundit

Çmimet e naftës në bursat botërore javën e kaluar u rritën për javën e pestë radhazi, duke arritur nivelin më të lartë që nga nëntori i kaluar, përcjell albinfo.ch.

Në bursën e Londrës, çmimi i një fuçie të naftës javën e kaluar u rrit 2.8% në 70.34 dollar, ndërsa në “Wall Street” një fuçi u rrit 4.9% në 63.08 dollarë.

Çmimet e naftës, pasi u rritën me 30 për qind në tremujorin e parë, u rritën në javën e parë të tremujorit të dytë, duke arritur nivelin më të lartë që nga fillimi i nëntorit.

Rritja e çmimeve është shkaktuar edhe nga rritja e numrit të vendeve të reja të punës. Në mars, Shtetet e Bashkuara hapën 196,000 vende pune, më shumë se sa pritej dhe shumë më tepër se një muaj më parë.

Çmimet gjithashtu rriten për shkak të pritjeve të investitorëve se SHBA dhe Kina do të arrijnë një marrëveshje tregtare, e cila do t’i japë fund luftës tregtare, e cila vitin e kaluar ndikoi negativisht në dy ekonomitë më të mëdha botërore.

Gjithashtu, rritja e çmimeve u shkaktua nga rënia e prodhimit të Organizatës së Vendeve Eksportuese të Naftës (OPEC) dhe Rusisë, të cilat i përmbahen një marrëveshje për të reduktuar prodhimin me 1.2 milion fuçi në ditë.

Çmimet e naftës janë gjithashtu në rritje për shkak të sanksioneve të SHBA-së mbi sektorët e naftës iraniane dhe venezueliane, duke kufizuar më tej furnizimin në treg.