Çmimet e barnave me recetë nën 10 franga do të rriten ndjeshëm vitin e ardhshëm

(KEYSTONE/Gaetan Bally)

Nga viti i ardhshëm pritet të rritet çmimi i të gjitha barnave me recetë që kushtojnë nën 10 franga, e ato që shiten me më shumë se 900 franga do të bien ndjeshëm, shkruan NZZ.

Pacientët që kanë nevojë për barna të lira, për shembull për trajtimin e presionit të lartë të gjakut, kolesterolit ose dhimbjeve kronike, duhet të përgatiten për një rritje çmimi, siguron NZZ am Sonntag, përcjell albinfo.ch.

Gazeta e së dielës saktëson se këto rritje janë pasojë e reformës së marzheve komerciale të barnave që planifikon Konfederata, përkatësisht marzheve që mund të kërkojnë farmacitë, mjekët dhe departamentet ambulatore të spitaleve gjatë dorëzimit të barnave.

Me këtë reformë do të rritet rreth 60% e barnave me recetë që shiten në farmaci. Produktet që kushtojnë më pak se 10 franga duhet të jenë dy herë më të shtrenjta vitin e ardhshëm. Ilaçet nga 35 franga duhet të lirohen paksa, ndërsa çmimi i atyre që shiten me 900 franga të ulet ndjeshëm.

Sipas NZZ am Sonntag, kjo masë do të kursejë para në pjesën e shpërndarjes në favor të sigurimit të detyrueshëm shëndetësor. Prandaj, shpenzimet e sigurimit të sëmundjes për produktet terapeutike duhet të bien me 60 milionë franga, shkruan 20mminuten.

Riorganizimi i këtij sistemi duhet të inkurajojë gjithashtu farmacistët dhe mjekët që të këshillojnë pacientët me më shumë dëshirë për të marrë barna gjenerike që janë më pak të kushtueshme.

Rrethet e interesuara janë mjaft të favorshme për këtë reformë, e cila vjen në një kohë kur ka disa muaj që vërehet mungesë e barnave të caktuara.

Nga ana e saj, Zyra Federale e Shëndetit Publik vlerëson se kjo zgjidhje “parashikon një rritje të caktuar të barnave me kosto të ulët”, por që përgjithësisht çon në kursime në favor të sigurimit shëndetësor, përcjell albinfo.ch.

Nga ana tjetër, shoqata e siguruesve shëndetësorë Santésuisse thotë se “kundërshtojnë me forcë çmimin e lartë të barnave të lira, të cilat gjithashtu shpesh paguhen nga xhepi nga pacientët dhe pacientët me zbritje të larta”.