Çka parasheh aneksi i zbatimit të planit për normalizimin e marrëdhënieve Kosovë – Serbi?

Bashkimi Evropian ka publikuar aneksin e zbatimit të planit për normalizimin e marrëdhënieve mes Kosovës dhe Serbisë. Ky aneks bëhet shtojcë integrale e marrëveshjes dhe palët angazhohen për t’i respektuar marrëveshjen dhe aneksin.

Marrëveshja dhe aneksi po ashtu bëhen kyç për integrimin e palëve. “Menjëherë pas miratimit të Marrëveshjes dhe këtij Aneksi, lehtësuesja, BE-ja, do të nisë procesin për të amandamentuar Kapitullin 35 për Serbinë për të pasqyruar detyrimet e reja të Serbisë që rrjedhin nga Marrëveshja dhe ky Aneks. Agjenda e Grupit Special të Kosovës për Normalizim po ashtu do të reflektojë obligimet e reja të Kosovës që burojnë nga Marrëveshja dhe Aneksi”, thuhet në aneks, përcjell albinfo.ch.

Mes tjerash, palët u pajtuan të trajtojnë me urgjencë Deklaratën për Personat e Zhdukur dhe implementimin e nenit 7 për vetëmenaxhim të komunitetit serb në Kosovë. “Për ta implementuar nenin 7, Kosova fillon menjëherë negociatat brenda dialogut të lehtësuar nga BE-ja për të krijuar aranzhime dhe garanci specifike për të siguruar nivel të përshtatshëm të vetëmenaxhimit për komunitetin serb në Kosovë, në përputhje me marrëveshjet e mëparshme përkatëse në dialog, siç përcaktohet nga BE-ja lehtësuese”, thuhet në aneks, përcjell albinfo.ch.

Brenda 30 ditësh do të themelohet Komiteti i përbashkët i Monitorimit që do të mbikëqyrë zbatimin e aneksit dhe për nenin 9, të përfitimeve financiare, thuhet se brenda 150 ditësh mbahet një konferencë donatorësh, por që mjetet nuk do të disbursohen pa u zbatuar aneksi.

Palët po ashtu janë pajtuar të implementojnë aneksin pa u ndikuar nga njëra-tjetra e pa e penguar njëra-tjetrën. Në rast se nuk e bëjnë zbatimin e neneve, atëherë ndikohen proceset e integrimit të tyre në Bashkimin Evropian.