Çitaku: Asnjë shtet nuk u jep azil kosovarëve

Askush më nuk po iu ofron azil shtetasve të Kosovës, dhe duke marrë një rrugë të tillë, ata vetëm dëmtojnë buxhetin e tyre dhe rrezikojnë jetën e tyre

“Kosova po i vuan pasojat e problemeve të shteteve fqinje në rastin e liberalizimit të vizave me Bashkimin Evropian”. Kështu është shprehur për Zërin e Amerikës, ministrja e Integrimeve Evropiane, Vlora Çitaku, e cila aktualisht po qëndron në një vizitë në SHBA.

“Kosova si pasojë i është nënshtruar një procesi shumë më rigoroz, një udhërrëfyesi shumë më kërkues. Përderisa vendet e rajonit kanë pasur rreth 50 kritere për t’i përmbushur, Kosovës i janë dhënë 101 kritere për t’i përmbushur në mënyrë që qytetarët tanë të mund të udhëtojnë pa viza”, ka deklaruar Çitaku.

Çitaku ka bërë me dije se një mision vlerësues i Komisionit Evropian do të vijë në Prishtinë javën e ardhshme, ndërkaq shprehet se të gjeturat e raportit që ky mision do ta përpilojë do të jenë pozitive.

“Migrimi ilegal nuk është shkaku por është pasoja e gjendjes jo të mirë në të cilën jetojnë qytetarët e Kosovës”, ka thënë ministrja më tutje.

“E vërteta është se askush më nuk po iu ofron azil shtetasve të Kosovës, dhe duke marrë një rrugë të tillë, ata vetëm dëmtojnë buxhetin e tyre dhe rrezikojnë jetën e tyre dhe në mënyrë indirekte ndikojnë edhe në zvaritjen e procesit të liberalizimit të vizave”, ka thënë Çitaku.