Cikalleshi i bën turqit të qajnë

Goli i Cikalleshit ia mundësoi Bashakshehirit që edhe matematikisht të sigurojë një vend në Ligën e Evropës për edicionin e ardhshëm

Sulmuesi i Kombëtares shqiptare, Sokol Cikalleshi ka shënuar një gol shumë me rëndësi për skuadrën e tij, por shumë të rëndë për skuadrën kundërshtare. Cikalleshi ka realizuar në minutën e 93-të për fitoren 2:1 të Bashakshehir Sport ndaj Eskisehirspor, shkruan albinfo.ch.

Goli i Cikalleshit ia mundësoi Bashakshehirit që edhe matematikisht të sigurojë një vend në Ligën e Evropës për edicionin e ardhshëm, por për skuadrën vendase, me këtë humbje me një këmbë janë në Ligën e Parë Turke.

Pas goli të realizuar nga sulmuesi i Kombëtares shqiptare, futbollistët Eskisehirspor shpërthyen në lot, pasi nuk mund të besonin se do të largoheshin nga Superliga turke, derisa edhe drejtuesit dhe tifozët u panë shumë të trishtuar për këtë humbje, një xhiro para përfundimit të kampionatit.

Ky ishte goli i pestë për Cikalleshin në kampionat me Bashakshehirin, ndërkohë që herën e fundit i kishte shënuar Konyasporit të Alban Mehës rreth dy muaj më parë. Cikalleshi ka shënuar edhe 7 gola në kupë, duke numëruar 12 gola në total me Bashakshehirin në sezonin e tij të parë në futbollin turk.