Çfarë sinjalesh solli vizita e Ursula von der Leyen për Kurtin e Osmanin

Leyen kërkon ulje të tensioneve në Kosovë

Presidentja e Komisionit Evropian, Ursula von der Leyen, qëndroi të mërkurën në Kosovë në kuadër të turneut të saj në Ballkanin Perëndimor. Gjatë vizitës, ajo u takua me Presidenten e Kosovës, Vjosa Osmani, dhe Kryeministrin në detyrë, Albin Kurti, në një takim të zhvilluar në ambientet e Kuvendit të Kosovës, përcjell albinfo.ch.

Në fokus të diskutimeve ishte përkushtimi i Kosovës ndaj rrugës së integrimit evropian, Plani i Rritjes për Ballkanin Perëndimor dhe kërkesa për heqjen e masave të BE-së ndaj Kosovës.

Pas takimeve, von der Leyen shprehu në një postim në platformën “X” angazhimin e BE-së për të ardhmen evropiane të të gjithë partnerëve të Ballkanit Perëndimor, duke theksuar se integrimi kërkon ndërtimin e institucioneve funksionale dhe uljen e tensioneve të brendshme.

Presidentja Osmani, sipas një njoftimi nga Presidenca, kërkoi heqjen e masave të padrejta ndaj Kosovës dhe theksoi rëndësinë e miratimit të Planit të Rritjes sapo Kuvendi i ri të fillojë punën. Ajo gjithashtu kërkoi që Kosovës t’i jepet statusi i vendit kandidat për anëtarësim në BE dhe theksoi përkushtimin e vendit ndaj reformave dhe demokracisë.

Ndërkohë, Kryeministri në detyrë, Albin Kurti, shprehu mirënjohje për mbështetjen e vazhdueshme të Komisionit Evropian dhe theksoi nevojën për dorëzimin e pyetësorit të anëtarësimit dhe avancimin e Kosovës drejt statusit të kandidatit. Ai foli edhe për zgjedhjet lokale të mbajtura së fundmi, duke i cilësuar të lira dhe demokratike.

Kurti i dorëzoi von der Leyen tri letra zyrtare për nisjen e dialogut strategjik në tri fusha kyçe: Bujqësi, Teknologji të Informacionit dhe Komunikimit (TIK), si dhe Industri të Mbrojtjes – sektorë ku Kosova shpreson të thellojë bashkëpunimin ekonomik me BE-në përmes iniciativës “Single Market Highway”.

Në përmbyllje, të dy liderët kosovarë kërkuan mbështetje më konkrete nga BE-ja, ndërsa von der Leyen ripërsëriti se rruga drejt integrimit kërkon veprime konkrete dhe bashkëpunim të vazhdueshëm.

---