Çfarë do të ndodhte me Zvicrën nëse emigracioni do të kufizohej?

Të djathtët, të cilët fituan shumicën e vendeve në Parlamentin zviceran në zgjedhjet e 22 tetorit, tani do të shtojnë fushatën e tyre për të kufizuar hyrjen e shtetasve të huaj në Zvicër.

Çfarë efekti do të kishte kjo në tregun e punës dhe ekonominë e vendit?

Partia Popullore Zvicerane (SVP), e cila forcoi pozicionin e saj si fraksion dominues në Parlament, është zotuar të vazhdojë përpjekjet e saj të gjata për të kufizuar numrin e punëtorëve të huaj që hyjnë në Zvicër, sipas thelocal.ch.

Partia ka argumentuar prej kohësh se emigracioni duhet të frenohet masivisht, sepse të huajt u heqin vendet e punës zviceranëve, kryejnë krime dhe abuzojnë me sistemin e mirëqenies sociale të vendit.

Aktualisht, partia po mbledh nënshkrime për të nisur ende votën kombëtare për të detyruar Këshillin Federal të anulojë “Marrëveshjen për Lëvizjen e Lirë të Personave me Bashkimin Evropian” që u lejon banorëve të BE-së një qasje pothuajse të pakufizuar në tregun e punës të Zvicrës.

Me fushatën e tyre “Jo 10 milionë Zvicrës”, një referencë për parashikimet që popullsia e vendit së shpejti do të arrijë shifrën 10 milionë për shkak të emigracionit – SVP po përpiqet të bindë votuesit se banorët e huaj “janë të dëmshëm për vendin tonë”, shkruan albinfo.ch.

Sipas partisë, emigrantët shkaktojnë mungesë banesash, rritje të qirave, bllokime trafiku, rënie të niveleve arsimore dhe një shpërthim të kostove shëndetësore”.

Por a janë të vërteta këto pretendime?

Është fakt se ndërsa popullsia rritet, infrastruktura aktuale mund të shtrihet deri në kufi, veçanërisht në një vend të vogël si Zvicra, ku burimet si toka për ndërtim janë të kufizuara.

Megjithatë, ndërsa fluksi i të huajve është një faktor kryesor në shpërthimin e popullsisë, ai nuk është i vetmi.

Një tendosje mbi burimet që SVP nuk e përmend kurrë është një jetëgjatësi më e lartë, që do të thotë se njerëzit jetojnë më gjatë se më parë. Në fakt, Zvicra ka një nga jetëgjatësitë më të larta në botë – 84.3 vjet mesatarisht, nga 82.8 një dekadë më parë.

Mungesa e fuqisë punëtore

SVP fokusohet në aspektet negative të emigracionit, duke injoruar ato pozitive.

Më e rëndësishmja prej tyre është se për të ruajtur ekonominë e saj të begatë, Zvicra nuk mund të varet vetëm nga fuqia punëtore vendase, pasi vendi vuan nga një mungesë gjithnjë e më e madhe e profesionistëve të kualifikuar në shumë sektorë.

Sipas një studimi nga Universiteti i Bazelit, “emigrantët me kualifikim të lartë mund të ndihmojnë në adresimin e këtij çekuilibri në tregun e punës”.

Dhe ekspertët mohojnë pretendimet e SVP-së se të huajt ua heqin punën zviceranëve. Kjo për shkak se punëdhënësit mund të punësojnë të huaj vetëm nëse nuk gjendet asnjë kandidat i përshtatshëm zviceran për një pozicion.

Në fakt, sipas këtij hulumtimi, të qenit në gjendje të punësosh profesionistë të huaj për fuqinë punëtore i sjell dobi ekonomisë zvicerane në afat të gjatë.

“Kjo lehtëson presionin mbi kompanitë, duke u mundësuar atyre që të vazhdojnë të operojnë dhe, në shumë raste, të krijojnë vende të reja pune – një gjë e mirë për ekonominë në tërësi”, thotë studimi.

Pra, është e qartë se përpjekjet e SVP-së për të frenuar në mënyrë drastike imigracionin, nuk do të ishin – pavarësisht pretendimeve të tyre për të kundërtën – në interesin më të mirë të Zvicrës.

“Gjatë 20 vjetëve të fundit imigrimi nga BE ka qenë thelbësor për të përmbushur kërkesën për fuqi punëtore”, sipas Sekretariatit të Shtetit për Çështjet Ekonomike, i cili shtoi se fuqia punëtore nga Bashkimi Evropian ka “kompensuar gjithashtu për një nevojë zëvendësimi të lidhur për demografinë”.

Kjo do të thotë se duke qenë se më shumë njerëz dalin në pension dhe në Zvicër nuk mund të gjenden kandidatë të rinj për vende të lira pune, punëtorët e huaj po e plotësojnë këtë boshllëk.

Prandaj, nëse imigracioni do të kufizohej ashpër, siç sugjeron SVP, Zvicra nuk do të ishte në gjendje të zgjidhte mungesën e fuqisë punëtore vetëm me fuqinë punëtore në dispozicion.

---