Brenda dy ditëve, asnjë kosovar nuk e kaloi kufirin

Sipas zyrtarëve në Beograd, brenda dy ditëve të fundit, nuk është raportuar asnjë rast i kalimit ilegal të kufirit nga kosovarët

Vala e emigrimit të kosovarëve drejt Bashkimit Evropian ka rënë dukshëm ditëve të fundit. Madje, autoritetet në Beograd tregojnë se brenda dy ditëve të fundit, nuk është raportuar asnjë rast i tentim-kalimit ilegal të kufirit ndërmjet Serbisë dhe Hungarisë nga ana e shtetasve të Kosovës.

Kryetarja e Komisionit parlamentar për Mbrojtjen dhe Punët e Brendshme, Marija Obradoviç deklaroi sot se Ministria e Brendshme po bën përpjekje për uljen e numrit të emigrantëve shqiptarë nga Kosova, që zgjedhin kufirin serb për t’iu drejtuar Bashkimit Evropian.

“Në 48 orët e fundit, asnjë kalim i paligjshëm i kufirit nuk është regjistruar, ndërsa për shembull, në gjysmën e parë të shkurt u ndaluan rreth 150 kalime të paligjshme”, tha Obradoviç për agjencinë “Tanjug”.

Ministria e Brendshme e Serbisë në bashkëpunim me kolegët nga vendet fqinje, si Gjermania dhe Austria, sipas Obradoviq, ka ulur ndjeshëm numrin e emigrantëve të paligjshëm mbi kufijtë serbë.

Ministria serbe ka shtuar praninë e policisë kufitare dhe ka dislokuar anëtarët shtesë të xhandarmërisë dhe të Policisë të Përgjithshme, të cilët kanë kontribuar në ndalimin e emigrantëve kosovarë të cilët përpiqen të kalojnë kufijtë muajt e fundit. Ajo tha se përgjithësisht, këta emigrantë janë me dokumente false dhe më një certifikate administrativ që iu jep mundësin e lëvizjes në Serbi.

Ndryshe, për të ndihmuar autoritetet serbe dhe ato hungareze në ndaljen e emigrantëve kosovarë drejt BE-së, Gjermania ka dërguar një kontingjent prej 20 policësh të cilët po përcjellin kufirin nëpërmjet kamerave termike. Në luftën për parandalimin e emigrantëve janë bashkuar katër shtete, Serbia, Hungaria, Gjermani dhe Austria.