Përfaqësuesi për Politikë të Jashtme i Bashkimit Evropian, Josep Borrell ka bërë thirrje që Kosova të largojë policinë nga ndërtesat e komunave, duke shtuar se edhe protestuesit e dhunshëm duhet të largohen. 

“Bashkimi Evropian e dënon dhunën në veri të Kosovës. Kjo sjell në një situatë të rrezikshme. Kam pasur kontakt me kryeministrin Albin Kurti këtë mëngjes dhe presidentin serb Aleksandar Vuçiq mbrëmë, dhe kam kërkuar nga të dyja palët që të marrin masa të shtensionohet gjendja. Si hap i parë pres që institucionet e Kosovës t’i heqin forcat policore nga ndërtesat e komunave në veri të Kosovës, dhe protestuesit të qetësohen”, ka thënë Borrell në një konferencë për media

Ai ka deklaruar se BE-ja pret që palët ta vazhdojnë dialogun dhe se punohet për dialog në nivel të lartë. 

“Ka pasur shumë dhunë. Ne kemi aktualisht një luftë në Evropë dhe nuk mund ta pranojmë edhe një konflikt tjetër”, u shpreh shefi i diplomacisë evropiane.