Bilanci i të prekurve me Covid në Kosovë, Shqipëri dhe në Maqedoninë e Veriut

Kosova, Shqipëria dhe Maqedonia e Veriut, shtete që kanë humbur kontrollin e menaxhimit të pandemisë

Instituti Kombëtar i Shëndetësisë Publike në Kosovë ka bërë të ditur se numri total i rasteve pozitive është 7.846 raste nga 35.570 persona të dyshimtë në virusin SARS-CoV-2, me gjithsej 196 raste të vdekjes, të cilët kanë pasur sëmundje të tjera shoqëruese, transmeton albinfo.ch.

Gjatë 24 orëve të fundit janë shëruar 138 pacientë, derisa numri i përgjithshëm i të shëruarve deri më sot është gjithsej 4.267 raste, kurse numri i rasteve aktive është 3.383.

Në Shqipëri janë regjistruar 108 raste të reja me koronavirusin e ri (COVID-19) dhe 2 persona kanë humbur jetën gjatë 24 orëve të fundit, transmeton tutje albinfo.ch.

Në njoftimin e përditshëm të Ministrisë së Shëndetësisë dhe Mbrojtjes Sociale, është bërë e ditur se numri i përgjithshëm i rasteve të konfirmuara në Shqipëri është rritur në 5.105 dhe numri i të vdekurve në 150.

Ndërkohë në Maqedoninë e Veriut sipas shifrave zyrtare të autoriteteve shëndetësore, gjatë ditës së djeshme nga gjithsej 1971 teste të kryera, janë diagnostikuar 188 pacientë të rinj, ndërsa numri i shëruar është 268. Për fat të keq, betejën me koronavirusin e ri e kanë humbur edhe pesë pacientë, transmeton albinfo.ch.

Që nga fillimi i pandemisë, në vend janë regjistruar 10.503 raste të Covid-19. Numri i pacientëve të shëruar është 5931, ndërsa numri i vdekjeve është 476. Aktualisht, numri i rasteve aktive në vend është 4096. /Albinfo.ch

 

---