Bie kërkesa për blerje të banesave

Përfaqësuesit e agjencive për patundshmëri thonë se vitin e fundit ka rënë dukshëm blerja e banesave. Çmimi megjithatë mbetet i njëjtë, 500 € në periferi ndërsa 3000 € në qendër

Kërkesat për blerje të banesave në Prishtinë kanë rënë dukshëm në krahasim me vitet e  kaluar, ndërsa çmimet vazhdojnë të mesin të njëjta. Kështu deklarojnë përfaqësuesit e agjencive për patundshmëri, sipas të cilëve, çmimi për metër katrorë i banesave shkon nga 500 euro në periferi deri 3000 euro në qendër.

Bashkim Ajdini, nga agjencia “Omega” në Prishtinë, ka thënë se interesimi i qytetarëve për të blerë banesa të reja ka rënë dukshëm në dy vjetët e fundit. Ai thotë për “Zërin” se këtë vit kërkesa për blerje të banesave të reja krahas viteve paraprake, ka rënë për 10 për qind.

“Viteve të fundit kemi një rënie të vazhdueshme të shitjes së banesave, ndërkohë çmimet mbeten të njëjta në qendër, kurse në periferi të qytetit çmimet kanë një rënie deri në 5 për qind. Tek lagjet periferike çmimet sillen 500-700 euro për metër katror, ndërsa në qendër çmimet sillen deri 3500 për metër katror. Te ndërtuesit po vërehet kriza, për shkak të rënies së kërkesës për blerje të banesave”, ka thënë Ajdini.

Ndërtimet e vjetra, siç tha ai, mbesin më të kërkuara dhe me çmime më të larta.

“Banesat e vjetra mbesin më të kërkuara nga qytetarët për arsye se shumica e tyre sot përdoren si zyra për bizneset, pastaj kanë përparësi për shkak të dokumentacioneve, afërsisë me qytetin, infrastrukturën e nevojshme” ka thënë ai.

Edhe përfaqësuesi i agjencisë “Orchinee” ka thënë se vërehet një rënie e interesimit të qytetarëve për të blerë banesa të reja.

“Krahasuar me vitet paraprake, në këto dy vjetët e fundit ka më pak qytetarë të interesuar. Mirëpo, tek ne kjo nuk po vërehet për shkak të ndërtimeve të shumta. Ne zakonisht marrim oferta të ndërtimeve, të cilat kanë kualitet dhe dihet se interesimi i tyre është më i madh” ka thënë përfaqësuesi i Agjencisë.

Sipas tij, çmimi i banesave për metër katror në lagjet periferike të kryeqytetit arrin deri në 1000 euro, ndërsa në qendër çmimet arrijnë deri në 3000 mijë euro.