Betim Bunjaku tërhiqet nga gara për ekzekutivin në Rapperswil-Jona

Me tërheqjen e kandidaturës së tij, ka thënë politikani i ri shqiptarozviceran “do të evitojë shkapërderdhjen e votave të spektrit të majtë e qendror”

Kandidati i pa parti për t`u zgjedhur në ekzekutivin e qytetit Rapperswil-Jona, Betim Bunjaku tërheq kandidaturën e tij për rundin e dytë të zgjedhjeve. Ai në një njoftim për media ka shkruar se do të përkrahë kandidaten e gjelbër, Silvia Kündig që kandidon për UGS-në, shkruan südostschweiz.ch.

Me tërheqjen e kandidaturës së tij, ka thënë politikani i ri shqiptarozviceran “do të evitojë shkapërderdhjen e votave të spektrit të majtë e qendror”, transmeton albinfo.ch. Ndonëse as në UGS nuk e sheh zgjidhjen ideale për qeverinë e qytetit, ai thotë se “ajo është megjithatë opsion më i mirë se të vijë një liberal i tretë (FDP) ose ndonjë konservator tjetër”.

Politikani i ri më tutje shpreh keqardhje për faktin se Rapperswil-Jona duket se edhe më tutje do të mbetet në duart e partive të djathta. “Blloku i djathtë nuk e ka ndërmend të hapet për demokracinë ose t`i qëndrojë konkordancës dhe kështu ai do të topisë edhe më tutje zhvillimin e qytetit”, ka shkruar Bunjaku. Ai thotë se do të vazhdojë të angazhohet politikisht, por e lë të hapur se në çfarë mënyre.

Në raundin e parë të zgjedhjeve që është mbajtur më 19 mars, Betimi kishte fituar 594 vota, ose kishte dalë i fundit, i pesti në listë.

Raundi i dytë mbahet më 21 maj. Aty do të marrë pjesë edhe kandidati i FDP-së me prejardhje boshnjake Ramiz Ibrahimovic, përcjell albinfo.ch. Ndonëse nuk i parashihen gjasa të mëdha, duhet theksuar se ai në raundin e parë pati zënë vendin e dytë, pas kandidatit favorit, Ueli Dobler nga CVP, i cili kishte fituar mbi 2700 vota.

Betim Bunjaku, 27 vjeçar, kishte kandiduar edhe për asamblenë e Komunës Rapperswil-Jona. Bunjaku është rritur në këtë qytet buzë Liqenit të Cyrihut. Ai ka një diplomë bachelor në ekonomi, nga Universiteti i St. Gallenit ku së shpejti do të marrë edhe masterin.