Besimtarët myslimanë në Zvicër festojnë Fitër Bajramin

Me lutjet për paqe e mirësi në familje, shëndet e harmoni mes vete, besimtarët myslimanë shqiptarë në Zvicër festojnë Fitër Bajramin

Besimtarët islamë sot në mbarë botën po festojnë Fitër Bajramin. Po kështu edhe shumë shqiptarë të zellshëm janë zgjuar herët në këtë ditë pushimi për ta kryer obligimin fetar, faljen e namazit. Madje edhe larg vendlindjes. Në përmasa të mëdha kjo vërehet tek shqiptarët e besimit mysliman në Diasporë.

Gjallëria e krijuar në xhaminë e Rorschach-ut sot kishte thyer qetësinë e zakonshme që mbretëron të dielave në Zvicër. Në një zonë të madhe industriale, ku radhitën xhamitë e komuniteteve të besimit islamë, shqiptarët mysliman bënë faljen e namazit nga kati tretë i një godine që përbrenda ka marrë pamje e një xhamie të mirëfilltë me të gjitha kushtet për të kryer ritet fetare.

Imami i kësaj xhamie, Alivebi Mediu, me një paraqitje elegante printe në ceremoninë e faljes së namazit. Por para kësaj, shumë kureshtarë dëgjonin më vëmendje porositë e imamit rreth të mirave materiale që na i ka falur Zoti, të cilat ne duhet ti shfrytëzojmë në mënyrë parimore, duke mos harruar aspektin social dhe human. E në fokus të ligjërimit apo „vajzit“  që i tregonte hoxha xhematit ishte shfrytëzimi i teknologjisë me të mirat e të metat që ka.

Ndërkohë që ora kishte shënuar shtatë të mëngjesit, imami Alivebi Mediu, nisë ceremoninë e faljes së namazit me lutjet drejtuar Allahut të Madhërishëm për paqë e mirësi, shëndet e të mira në çdo familje.

„Mesazhi im është që të bashkohemi rreth çështjes fetare e kombëtare, të rrimë bashkë e të mos shpërndahemi, të jemi model i fëmijëve, i ardhmërisë. Dhashtë Zoti të bashkohemi e të kemi një fitim për krejt popullin siç kemi ëndërruar gjithmonë të jemi të zotë e vedetës“  tha imami Alivebi Mediu.

Muaji i Ramazanit në përgjithësi ka kaluar mirë; „fillimisht ka pasur më pak xhemat, sepse ka qenë pushimi i verës, por javët e fundit janë kthyer dhe mirë ka kaluar, nuk ka pasur probleme“ shpjegon imami Alivebi Mediu.

Me një urim të shkurtër besimtarëve iu drejtua edhe kryetari i xhamisë Emrush Rexhepi, i cili ndër të tjera tha se ky muaj i shenjtë i Ramazanit kërkon nga  ne të jemi të bashkuar e solidarë.

Të ndihmojmë njëri tjetrin e të gjendemi pranë njerëzve tanë si në mirësi ashtu edhe në vështirësi. Solidariteti që kërkohet me rastin e Fitër Bajramit, krahas vitrave, kësaj radhe në xhaminë e Rorschach-ut u shpreh në përmasa të kënaqshme në ndihmë e përkrahje materiale të jetimëve, familjeve, vajzave e grave të përdhunuara nga agresioni serb mbi Kosovë gjatë luftës së fundit. Këto mjete materiale, siç na thotë babai i tre fëmijëve Emrush Rexhepi nga Shkupi, i dërgohen shoqatës në Kosovë „Jeta në Kastriot“.

Pas faljes së namazit dhe urimet e Fitër Bajramit mes xhematit ata që dëshironin mund të ndihmonin aksionin në zyrën e xhamisë në përkrahje të vajzave e grave të përdhunuara.