Besa luan turnirin tradicional në stadiumin e vjetër të FC St. Gallenit

Koha e brishtë e me të reshura të shpeshta shiu nuk i kishte ndaluar të rinjtë e St. Gallenit për të marrë pjesë në turnirin tradicional të futbollit që e organizon për çdo vit ekipi shqiptar, FC Besa.

I njohur si njëri ndër ekipet më të vjetra të diasporës shqiptare në Zvicrë, Besa, ka organizuar gjatë ditës së shtunë dhe të diel, turnirin në fushën e vjetër të Sankt Gallenit, në Espemoos, para dhjetëra futbolldashësve.

Kjo fushë e pajisur me një tribunë të mbuluar për shikuesit, ishte ideale për t’i ikur motit të brishtë e me shi, ku pjesëmarrësit që luanin herë pas here nëpër shi, gjenin strehë nën mbulojat e stadiumit ku për shumë vite kishte qenë arenë e përmballjëve të ekipeve nga Superliga zvicerane.

Mes shumë futbollistëve te rinj dhe muzikës popullore që luhej live në ambient të hapur, musafir i këtij turniri ishte edhe lojtari i përfaqësuesës së Kosovës, Kristian Nushi, i cili këtë turnir e vlerësoi si një ngjarje të mirë ku bashkohen bashkatdhetarët për të kaluar një fundjavë relaksuese me futboll.

Kandidati për zgjedhjet nacionale, Arbër Bullakaj, e vlerësoi turnirin e Besës si një ngjarje të rëndësishme që mbledhë rininë në këtë eveniment sportiv e relaksues.

Me 21 ekipe të regjistruar për pjesëmarrjeje të ndara në pesë grupe, në finale u përballën Ludoviku dhe kafeteria Dior.

Ludovik e fitoi ndeshjen me rezultat 2-0. Vendin e tretë mori Lojani. Kurse lojtari më i mirë i shpallë, Adrian Morina.

---