“Besa”, në qiell të hapur në sheshin e Gjenevës

Në “Plainpalais” të Gjenevës, në prani të një audience të personaliteteve zvicerane, gjenevase dhe shqiptare, të hënën u hap ekspozita "Besa", ose shpëtimi i hebrenjve në Shqipëri gjatë Luftës së Dytë Botërore.

Ekspozita Besa u bashkorganizua nga Universiteti Shqiptar Popullor (UPSH), Am Your Protector dhe Yad Vashem në Gjenevë.

Gjatë ceremonisë së hapjes, të moderuar nga nikoqirja e kësaj ekspozite, zonja Albana Krasniqi-Malaj, folësit e ndryshëm, duke përfshirë Pierre Maudet, këshilltar i shtetit në krye të Departamentit të Sigurisë dhe Ekonomisë, Guillaume Barazzone, kryetar i Bashkisë së Gjenevës, Martine Brunschwig Graf, presidente e Komisionit Federal Kundër Racizmit, Joel Herzog, president i Miqve të Yad Vashem në Gjenevë dhe bashkorganizator i ekspozitës, Metin Arditi, i emëruar nga UNESCO-s Ambasador i Vullnetit të Mirë, Ilir Gjoni, ambasador i Shqipërisë në Bernë, Valon Murati, ministër i Diasporës së Kosovës dhe Manuel Tornare, këshilltar nacional dhe kryetar i UPSH-së, vlerësuan guximin e shqiptarëve për të shpëtuar jetë të pafajshme hebrenje.

Kjo ekspozitë do të jetë e hapur në çdo kohë në sheshin “Plainpalais” në Gjenevë, deri më 16 shtator 2016.