BERZH-i ndihmoi 600 biznese të vogla në Kosovë

Kosova u bë anëtare e BERZH-it në dhjetor të vitit 2012, ndërsa ky institucion është në Kosovë nga vitit 1999 duke nënshkruar, për 15 vjet, 37 projekte në vlerë 89 milionë €

Banka Evropiane për Rindërtim dhe Zhvillim (BERZH) gjatë 15 viteve të kaluara ka  nënshkruar 37 projekte në Kosovë, me një shumë neto prej 89 milionë eurosh. Kurse mbi 600 biznese të vogla dhe të mesme kanë marrë shërbime këshilluese nga BERZH, për t’u rritur dhe për të krijuar vende të reja të punës.

Kështu tha sot në prezantimin e Fondit për Zgjerimin e Ndërmarrjeve (ENEF), një platformë e NVM-ve (Ndërmarrjeve të Vogla dhe të Mesme) e krijuar nga shumë-partnerë dhe i cili promovon qasjen në financa për NVM-të me potencial të lartë të rritjes…

Kjo ngjarje mblodhi përfaqësues të qeverisë, organizatave ndërkombëtare, NVM-ve dhe shoqatave të biznesit për të diskutuar punën e BERZH-it me NVM-të në Kosovë dhe ndikimin e saj.

Hapja e kësaj ngjarje u shënua nga Jean-Marc Peterschmitt, drejtori menaxhues i BERZH-it për Evropën Qendrore dhe Juglindore, i cili foli për aktivitetet e fundit për zhvillimin e sektorit privat në Kosovë.

Ndërsa Hykmete Bajrami, ministre e Ministrisë së Tregtisë dhe Industrisë, theksoi intensifikimin e bashkëpunimit me BERZH-in dhe koordinimin e mëtejshëm në mbështetje të sektorit privat në Kosovë.

Fabio Serri, udhëheqës i Grupit të Financave dhe Zhvillimit për Ballkanin Perëndimor diskutoi mbi masat plotësuese për përmirësimin e qasjes në financa dhe në njohuri për bizneset.

“BERZH-i është i kënaqur që është pjesë e Fondit për Zgjerimin e Ndërmarrjeve (ENEF), i cili ofron një mundësi të jashtëzakonshme për bizneset në Kosovë. Qasja në financa dhe këshilla janë elemente të rëndësishme për të promovuar rritjen e biznesit, inovacionit dhe konkurrencës së bizneseve lokale si në tregun e brendshëm ashtu edhe atë evropian’’, tha Serri.

Kryeministri i Kosovës, Isa Mustafa në një takim që pati me drejtorin për Evropën Qendrore dhe Juglindore, Jean-Marc Peterschmitt, e vlerësoi lartë bashkëpunimin me BERZH-in për ekonominë e Kosovës, respektivisht për fuqizimin dhe rritjen e rolit të gruas në zhvillimin ekonomik, duke përkrahur idetë dhe iniciativat konkrete biznesore të grave kosovare.

Kryeministri po ashtu kërkoi që BERZH-i të ketë në fokus të përkrahjes, financimin dhe mbështetjen më të madhe për idetë dhe iniciativat e të rinjve në biznes. Ai po ashtu vlerësoi  lartë përkrahjen e projekteve nga BERZH-i, si projektet që ndërlidhen me efiçiencën energjetike, transmisionit, por edhe mbështetjen e BERZH-it për Fondin për Sigurimin e Depozitave në Kosovë.

Ndryshe, Kosova u bë anëtare e BERZH-it në dhjetor të vitit 2012. BERZH, ndërkaq është në pronësi të 64 vendeve dhe dy institucioneve ndërqeveritare, dhe mbështet zhvillimin e ekonomive të tregut dhe demokracive.