BE: Për zbatimin e marrëveshjes duhet diskutim mes liderëve të Kosovës dhe Serbisë

Zëdhënësi i Bashkimit Evropian për Punët e Jashtme, Peter Stano, ka deklaruar se diskutimi për zbatimin e Marrëveshjes bazë për normalizim të marrëdhënieve mes Kosovës dhe Serbisë, duhet të bëhet në mes të liderëve të palëve.

“Zbatimi i marrëveshjes për rrugën drejt normalizimit, sikur edhe kërkesat shtesë për normalizim, kanë nevojë të adresohen nga liderët gjatë takimit të radhës në nivel të lartë, në kuadër të dialogut”, tha Stano.

BE-ja në fillim të kësaj jave tha se do të shtojë trysninë mbi të dyja vendet për zbatimin e kësaj marrëveshjeje.

Stano tha se takimi i së martës “ishte i rëndësishëm për të saktësuar faktet dhe për të sqaruar disa çështje”.

“Palët u pajtuan që të vazhdojnë diskutimet për këtë çështje të hënën me 25 mars, me qëllim që të diskutojnë propozimet konkrete dhe të gjejnë një zgjidhje afat-shkurte”, shtoi ai./REL