BE paralajmëron vendet e bllokut që të përgatiten për miliona refugjatë ukrainas

pixabay

Numri i refugjatëve që do të hyjnë në Evropë nga Ukraina mund të arrijë rreth katër milionë, njoftoi BE në një konferencë shtypi në Bruksel, shkruan thelocal, përcjell albinfo.ch.

Pasi ministrat e brendshëm u mblodhën për një takim të posaçëm të vendeve anëtare të BE-së për të diskutuar krizën, udhëheqësit treguan se nevoja për të ndërhyrë po bëhej gjithnjë e më urgjente. “Ne jemi dëshmitarë të asaj që mund të bëhet kriza më e madhe humanitare në kontinentin tonë evropian në shumë e shumë vite. Nevojat po rriten ndërsa flasim”, tha Janez Lenarcic, Komisioneri Evropian për Ndihmën Humanitare dhe Menaxhimin e Krizave.

Ai tha se numri i ukrainasve të prekur nga konflikti në aspektin humanitar mund të jetë 18 milionë brenda vetë Ukrainës, ndërsa shtatë milionë njerëz janë në rrezik të zhvendosjes së brendshme dhe katër milionë mund të largohen nga vendi si refugjatë. Kjo është një shifër e bërë jehonë edhe nga agjencia e OKB-së për refugjatët.

Më shumë se 368,000 refugjatë, kryesisht gra dhe fëmijë, kanë ikur nga Ukraina në vendet fqinje deri më tani bazuar në të dhënat nga autoritetet kombëtare, tha agjencia të dielën, përcjell tutje albinfo.ch.