BE-ja ia humb Kosovës miliona euro

Produktet kosovare që nga fillimi i këtij viti nuk mund të eksportohen në vendet e Bashkimit Evropian, pa iu nënshtruar tarifave doganore apo kufizimeve për sasitë.

Përfaqësues të bizneseve kanë deklaruar se më ndërprerjen e preferencave tregtare, Kosova ka humbur milion euro eksport.

Kryetari i Aleancës Kosovare të Biznesit, Agim Shahini ka theksuar se mungesa e preferencave ka bërë që shumë kompani të humbin një pjesë të madhe të tregjeve të eksportit, raportojnë mediat.

Përveç efekteve negative që janë shkaktuar në eksport, sipas tij ndalimi i preferencave ka pasur ndikim edhe në efektin e punësimit, në pozitën konkurruese, si dhe në humbjen e partnerëve.

Ai ka vënë në pahë se institucionet vendëse dhe ndërkombëtare, deri tash nuk kanë bërë asgjë që këto preferenca të vazhdohen.

Një ndër bizneset e shumta të cilat kanë pësuar nga mos vazhdimi i preferencave tregtare është Vreshtaria dhe Veraria “Stone Castle” në Rahovec. Menaxherët e kësaj kompanie, kanë theksuar se humbjet në këtë kompani janë shumë të mëdha, pasi që me produktet e tyre, tani janë jo konkurrues.

Hapat e marrë nga Qeveria e Kosovës për vazhdimin e këtyre preferencave tregtare, sipas tyre kanë qenë pa rezultate.

Por, Ministrja e Tregtisë dhe Industrisë Mimoza Kusari – Lila, kohë më parë për media, ka thënë se institucionet e BE-së po mundohen që përmes Komisionit Evropian të arrijnë një konsensus, që në shtator të këtij viti, kjo çështje të zgjidhet.