BDI-së i hyri “fitili”, nis ndarja  

Kanë mbetur vetëm çështje kohe, kur të pakënaqurit e kësaj parti, ta themelojnë një parti të re, njëjtë siç ka ndodhur në Kosovës

Partia që barti mbi vete imazhin e luftës në Maqedoni, Bashkimi Demokratik për Integrim (BDI), 14 vjet pas themelimit duket se ka filluar të shpartallohet. Kanë mbetur vetëm çështje kohe, kur të pakënaqurit e kësaj parti, ta themelojnë një parti të re, njëjtë siç ka ndodhur në Kosovë.

Mediat në Maqedoni thonë se të pakënaqurit kanë filluar të nënshkruhen te notari, me të cilën do të dëshmojnë se janë edhe themeluesit e subjektit të ri politik, që do të quhet “Uniteti”, shkruan almakos.

Për një kohë më të gjatë në opinion qarkullojnë informatat për pakënaqësi të theksuara brenda kampit të integristëve. Më vonë, pakënaqësitë u shndërruan edhe në konflikte të armatosura. Në Kumanovë humbi jetën komandant “Shqiponja”, i cili ishte pretendent për degën e BDI-së në Kumanovë, por që u vra nga vet BDI.

Disa ditë më vonë, në Strugë u vra edhe një tjetër funksionar i BDI-së, Argëtim Asani.

Kohë më parë u paralajmërua se grupi i pakënaqur brenda BDI-së do të formojë një parti politike me qëllim që përfundimisht të distancohet nga udhëheqësia e deritanishme e kësaj partie. Pritet që partisë “Uniteti” t’i prijnë Rafiz Aliti, Hazbi Lika, Zylfi Adili, Fatmir Dehari dhe disa figura tjera të BDI-së.