Bashkëpunimi Kosovë – Shqipëri, në nivel të kënaqshëm

Sa i përket portit të Shëngjinit, të dy Qeveritë ka kohë që janë pajtuar që të jetë nën menaxhimin e autoriteteve të Kosovës

60 kilometërshi i autostradës Morinë – Merdar, pritet të përurohet në fund të nëntorit të këtij viti, u tha në takimin ndërmjet Ministrit të infrastrukturës së Kosovës, Fehmi Mujota dhe atij të transporteve dhe punëve publike të Shqipërisë, Sokol Olldashi.

Të dy ministrat në Prishtinë, kanë biseduar edhe për një varg çështjesh që kanë të bëjnë me hapësirën e lartë ajrore, e cila, aktualisht është kompetencë e NATO-së. Ministri Mujota, ka bërë të ditur se me gjithë përpjekjet dhe lehtësirat, kjo do t’i mbetet tregut të vendos.

Ministrat e të dyja vendeve nuk kanë lënë asnjë alternativë transporti që lidh këto dy vende pa e diskutuar. Por, kur është përmendur linja hekurudhore, ministri Olldashi ka deklaruar se nuk është koha të shpenzohet për të.

Linja hekurudhore mes këtyre dy shteteve ka qenë edhe premtim i përbashkët i kryeministrit Hashim Thaçi dhe atij të Shqipërisë, Sali Berisha.

Sa i përket portit të Shëngjinit, që të dy Qeveritë ka kohë që janë pajtuar që të jetë nën menaxhimin e autoriteteve të Kosovës. Ministrat janë deklaruar se nuk mund t’i detyrojmë transportuesit e Kosovës që ta shikojnë si një alternativë këtë port, siç e shikojnë tani alternativë portin e Durrësit.　

Edhe Kryeministri, Hashim Thaçi, ka pritur Ministrin e Transporteve dhe Punëve Publike të Republikës së Shqipërisë, Sokol Olldashi.

Ministrat　 Olldashi me homologun nga Kosova, Fehmi Mujota, e njoftuan kryeministrin me　 çështjet dhe fushat e bashkëpunimit të këtyre dy ministrive në sektorin e infrastrukturës dhe të transporteve, njofton Zyra e Kryeministrisë.　

Në takim është vlerësuar niveli i kënaqshëm i bashkëpunimit Kosovë – Shqipëri.　Kryeministri Thaçi ka shpreh gatishmërinë e Qeverisë së Kosovës për të mbështetur të gjitha iniciativat e bashkëpunimit　 midis dy vendeve në fushën e infrastrukturës dhe komunikacionit, por edhe në të gjitha fushat tjera.

Thaçi e Olldashi gjatë takimit kanë diskutuar edhe për aktivitete që do të zhvillohen gjatë këtij viti jubilar të 100 vjetorit të Pavarësisë së Shqipërisë. Thaçi me këtë rast ka theksuar se edhe Kosova do të kremtojë këtë festë të madhe kombëtare me të arritura të mëdha në shtetndërtim dhe zhvillimin e përgjithshëm të vendit.