Basha zyrtarizohet në Aris

Futbollisti shqiptar u largua nga Italia për të kaluar në Superligën greke

Futbollisti shqiptar, Migjen Basha është zyrtarisht futbollist i Arisit të Selanikut në Superligën e Greqisë.

Mesfushori ka nënshkruar kontratë 2-vjeçare me klubin grek, pas përvojës së fundit me Barin në Serinë B, skuadër më të cilën nuk arriti të siguronte një vend mes më të mirëve në futbollin italian.

Në njoftimin për shtyp të zyrtarizimit të Bashës në faqen e Arisit jepet jetëshkrimi i 31-vjeçarit, që e nisi karrierën në vitin 2004 te FC Lausanne në Zvicër.

Basha ka një karrierë të pasur në futbollin italian me Frosinonen, Atalantën, Torinon, Comon e Barin, përcjell albinfo.ch.

Basha ka kaluar në të gjitha ekipet e moshave të Zvicrës (U-17, U-18, U-19, U-21), ndërsa nga viti 2013 është pjesë e Kombëtares së Shqipërisë, të cilën e përfaqësoi edhe Kampionatin Evropian më 2016.