Banka Botërore, 11 milionë $ për arsimin kosovar

Banka Botërore i jep Kosovës 11 milionë dollarë kredi, për projektin “Përmirësimi i Sistemit Arsimor në Kosovë”

Ministria e Financave e Qeverisë së Kosovës dhe Banka Botërore, kanë nënshkruar sot  në Prishtinë marrëveshjen financiare për kredi në vlerë 11 milionë dollarë për realizimin e projektit “Përmirësimi i Sistemit Arsimor në Kosovë”. Projekti bazohet në reformat e vazhdueshme dhe në rezultatet e arritura deri më sot në arsim.

“Ky projekt synon avancimin e reformës së autonomisë së shkollave, përmirësimin e sistemeve të certifikimit të mësuesve dhe vlerësimit të studentëve, si dhe forcimin e kapaciteteve të monitorimit të arsimit me qëllim të përmirësimit të mekanizmave kryesor të sistemit të arsimit në Kosovë, të nevojshme për përmirësime në cilësinë e arsimit”, thuhet në njoftimin e Ministrisë .

Sipas të njëjtit njoftim, përmirësimi i cilësisë së arsimit është në krye të agjendës së politikave të arsimit të Kosovës.

“Aktivitetet e projektit do të kontribuojë në drejtpërdrejt në rritjen e kapaciteteve të Qeverisë dhe të Ministrisë së Arsimit, Shkencës dhe Teknologjisë për të arritur këtë objektiv. Duke u fokusuar në forcimin e institucioneve, sistemeve dhe mekanizmave, projekti do të kontribuoj për ngritjen e cilësisë në sistemin arsimor”, thuhet në njoftim, transmeton Albinfo.Ch.