Ava Max, një tjetër shqiptare e suksesshme në botën e muzikës

Këngëtarja amerikane me prindër nga Shqipëria, Ava Max, emri i vërtetë i së cilës është Amanda Koçi, e cila vazhdon të jetë prej disa javësh në vendin e parë në Britaninë e Madhe, Gjermani dhe në gjithë Evropën, e cila së fundmi është në majë të top listës amerikane me hitin e saj “Sweet But Psycho”, në një intervistë për mediat londineze ka treguar udhëtimin e saj drejt suksesit.

“Nuk ka qenë aspak e lehtë. Prindërit e mi u larguan nga Shqipëria në fillim të viteve ’90 dhe përfunduan duke jetuar në një kishë në Paris. Më pas u zhvendosën në Shtetet e Bashkuara, ku dhe u linda unë. Prindërit e mi shiten shtëpinë në Wisconsin për t’u zhvendosur në Los Anxhelos, por edhe atje zhgënjimi ishte shumë i madh. Pas shumë përpjekjesh, vendosa lidhjet me producentin Circuit, i cili ka realizuar hitet e Rihanës apo The Weeknd etj., i cili vendosi të kujdeset për karrierën time muzikore”, shprehet Ava Max.

24-vjeçarja ka deklaruar se edhe përse ka lindur në Shtetet e Bashkuara, ajo është krenare për origjinën e saj. 

“Jam 100 për qind shqiptare. Dëshiroj të ndihmoj familjen time, miqtë e mi dhe njerëzit në përgjithësi dhe dua të kontribuoj për komunitetin shqiptar kudo që të jem. Do të ishte e jashtëzakonshme që të mbaj një koncert bamirësie atje. Është me shumë rëndësi për mua që të kontribuoj për komunitetin shqiptar”, ka thënë ajo.