Austria e shqetësuar me azilkërkuesit kosovarë

Ministrja e Brendshme të Austrisë, Johanna Miki-Leitner tha se të gjitha kërkesat për azil do të refuzohen dhe emigrantët ilegal do të kthehen në Kosovë

Ministrja e Brendshme të Austrisë, Johanna Miki-Leitner tha se vendi i saj është shumë i shqetësuar me numrin në rritje të azilkërkuesëve nga Kosova. Ajo ritheksoi se të gjitha kërkesat për azil do të refuzohen dhe emigrantët ilegal do të kthehen në Kosovë.

Austria, sipas saj, e konsideron Kosovën vend të sigurt për jetë, prandaj edhe kërkesat për azil janë të papranueshme.

Këto deklarata, ministrja austriake i bërë pas një takimi që zhvilloi në Vjenë, me ministrin e Punëve të Brendshme të Republikës së Kosovës, Skender Hyseni. Ky i fundit tha se liberalizimi i shpejtë i vizave për kosovarët, e vë nën kontroll dhe ndalë migrimin ilegal.

“Në rend të parë janë shkaqet ekonomike dhe sociale, , që shtyjnë një numër qytetarësh të Republikës së Kosovës të migrojnë ilegalisht në BE. Por edhe pamundësia për të qarkulluar lirshëm në Zonën Shengen ndikon në migrimin ielgal”, deklaroi ministri Hyseni, duke apeluar, për heqjen e vizave.

Hyseni tha se Kosova nuk duhet të mbetet vendi i vetëm i izoluar në Ballkan, dhe liberalizimi i shpejtë i vizave, sipas tij, është në dobi të qytetarëve të Republikës së Kosovës dhe shteteve të Bashkimit Evropian të cilat po përballen me fluks të madh të migrimit të kosovarëve.

“Qeveria e Republikës së Kosovës në anën tjetër do të adresojë në afat të gjatë shkaqet e migrimit ilegal”, tha ai.

Gjatë takimit të përbashkët, dy ministrat kanë biseduar për një varg çështjesh të interesit të ndërsjellë, në funksion të forcimit të mëtejmë të marrëdhënieve bilaterale Kosovë-Austri.  Ndërsa terrorizmi global dhe ekstremizmi i dhunshëm, ishte një temë tjetër e dy ministrave.