Artisti kosovar me ekspozitë personale në Berlin

Artisti Dardan Zhegrova ka hapur ekspozitë personale në Berlin, ai ishte fitues i disa çmimeve bashkë me Lola Sylajn në konkursin “Artistët e së nesërmes” në kryeqytet, është pjesë e ekspozitës “A Spaghetti Dress for World Peace”, transmeton albinfo.ch

Në të hapur të ekspozitës të pranishmit mund të vazhdonin hulumtimin e tyre drejtë ëndrrave, fantazive, iluzioneve dhe mendimeve, pasi pikërisht artisti Zhegrova kishte sjellë përmes ekspozitës së tij një përzierje në mes realitetit dhe imagjinatës.

‘I’m Meeting A Hybrid Of Past And Now’ u hap me 14 shkurt në hapësirën FRAGILE në Berlin, ku Zhegrova, për këtë ekspozitë ka krijuar një punë të re, kukulla më të mëdha në gjatësi bazuar në kukullat që përdoren zakonisht në teatër, plus edhe një incizim të ri zanor, shkruan Kultplus.

Sikur edhe herave tjera, punët e Zhegrovës ngërthejnë poezinë dhe prodhimin e kukulla amorfe të mëdha.

Zhegrova paraqet personalitetin e tij por me anë të ekspozitës edhe e shpalosë veten dhe imagjinatën e tij gjatë fëmijërisë, derisa një element tjetër është takimi mes vetes dhe tjetrit në një botë të influencuar shumë prej internetit.

Disa prej ekspozitave kolektive ku Zhegrova ka marrë pjesë janë: ‘Friend of a Friend, SVIT Gallery’ në Pragë, ‘I travelled the world and the seven seas’ në Antwerp, ‘I kissed your kiss on your girlfriend’s cheek, it was still wet’ në Lisbonë, e ekspozita tjera.