Art dhe diplomaci në nder të Shën Nënë Terezës në Ambasadën e Kosovës në Suedi

Stokholmi nderon 115-vjetorin e lindjes së Shën Nënë Terezës me ekspozitë nga Ambasada e Kosovës

Në vigjilje të hapjes së ekspozitës së dedikuar 115-vjetorit të lindjes së Shën Nënë Terezës, Ambasada e Kosovës në Stokholm organizoi sot një ceremoni të veçantë me domethënie të madhe kulturore e shpirtërore, përcjell albinfo.ch.

Në këtë kuadër, Ambasadorja e Republikës së Kosovës në Suedi, Shkendije Geci-Sherifi, së bashku me piktoren e njohur Jalldeze Mustafa, ia dorëzuan Nunciaturës Apostolike të Vatikanit në Stokholm një vepër arti të artistes, pjesë e koleksionit të ekspozuar.

Ekspozita, e cila sjell në qendër figurën e Shën Nënë Terezës – humanistes shqiptare që u bë zëri i mëshirës në mbarë botën – vë në pah trashëgiminë e saj të jashtëzakonshme dhe rrënjët e forta shqiptare që e shoqëruan në çdo hap të misionit të saj.

Në fjalën e saj, Ambasadorja Geci-Sherifi theksoi rolin e çmuar që Shën Nënë Tereza ka në identitetin tonë kombëtar dhe frymëzimin e pashtershëm që ajo jep për brezat. Ajo rikujtoi edhe domethënien e Kishës së Letnicës në Kosovë, ku e reja Gonxhe Bojaxhiu përjetoi thirrjen e parë shpirtërore – moment i cili shënoi nisjen e rrugëtimit të saj humanitar. Për më tepër, Ambasadorja nënvizoi se dorëzimi i pikturës në Ditën e Flamurit Kombëtar është një simbol i fuqishëm i lidhjes së figurës së Shenjtores shqiptare me krenarinë dhe identitetin tonë kombëtar.

Nga ana tjetër, në emër të Nunciaturës Apostolike, Rev. Fr. Domenico Votolo shprehu falënderimet dhe mirënjohjen e thellë për këtë gjest të ndjeshëm dhe reprezentues. Ai theksoi se Shën Nënë Tereza është nënë e gjithë njerëzimit – një figurë universale që mishëron paqen, mëshirën dhe solidaritetin pa kufij.

---