Arrestohet sërish Azem Syla, dyshohet për kërcënim të dëshmitarëve

Derisa herën e parë ishte akuzuar për shitje të tokave të shtetit, kësaj here ai me urdhër të EULEX-it, është arrestuar për kanosje të dëshmitarit të mbrojtur

Një javë pasi Gjykata e Apelit e la të lirë ish-deputetin e PDK-së dhe ish-komandantin e Përgjithshëm të UÇK-së, Azem Sylën,  ai është arrestuar përsëri sot në mëngjes. Derisa herën e parë ishte akuzuar për shpronësim dhe shitje të tokave të shtetit, kësaj here ai me urdhër të EULEX-it, është arrestuar për kanosje të dëshmitarit të mbrojtur.

Arrestimin e ti e ka konsideruar avokati mbrojtës, Tomë Gashi. Ai ka shkruar në Facebook se Syla është arrestuar kinse për arsye të ndikimit në njërin prej dëshmitarëve të mbrojtur.

“Sipas kërkesës se Prokurorit të EULEX-it, gjyqtarja në rastin ‘Toka’ sot më 16 shtator 2016 ka lëshuar një urdhër për arrestimin e Azem Sylës, me arsyetim se kinse në këtë rast ka tentim të ndikimit në njërin prej dëshmitarëve të mbrojtur. Ne urdhrin për arrestim të Gjykatës Themelore në Prishtinë qartë thuhet se dikush tjetër e jo Azem Syla kinse e ka kontaktuar dëshmitarin e mbrojtur kohë më parë pas lirimit të Sylës dhe të tjerëve nga paraburgimi”, thotë avokati Gashi.

Sipas vendimit të Gjykatës, Azem Syla sot përsëri do të dal para gjyqtarit të procedurës paraprake në Gjykatën Themelore ne Prishtinë.

Ndryshe, Azem Sylën dyshohet si udhëheqës i një grupit kriminal që janë marrë me shitjen e tokave shoqërore e që i ka kushtuar dëme buxhetit të Kosovës rreth 30 milionë euro. Ai është arrestuar në prill të këtij viti bashkë me 51 persona të tjerë, përfshirë edhe ish kryetarin e Gjykatës Komunale të Prishtinës, Nuhi Ukën.

Por, një javë më parë, Gjykata e apelit ka liruar nga arresti Sylën dhe disa të tjerë, me kushtin që të lajmërohen një herë në javë në stacionin më të afërt të policisë.

Ndryshe, Azem Syla ishte bërë objekt debati edhe në mediat zvicerane, ku kishte qëndruar disa vite dhe kishte marrë pension “invalid psikik”. Derisa Syla ishte deputet i Kuvendit të Kosovës, u zbulua se ai nuk është i sëmurë dhe për disa vite ka dëmtuar qindra mijëra franga buxhetin zviceran.