Arrestohet mërgimtari në Skënderaj

Një mërgimtar nga Italia është arrestuar në Skënderaj, pasi dyshohet se ka sulmuar e kërcënuar dy gjyqtarë të Gjykatës Themelore të Mitrovicës

Një person është arrestuar në Skënderaj, si i dyshuar për sulm dhe kërcënim ndaj dy gjyqtarëve të Gjykatës Themelore të Mitrovicës, degës në këtë komunë.

Lajmi për sulmin është konfirmuar për “KALLXO.com” nga Astrit Dibra, administrator i kësaj gjykate, përcjell albinfo.ch.

“Personi në fjalë është ulur para veturës së dy gjyqtarëve të cilët ishin duke shkuar në gjykim në Vushtrri. Meqë jeton në Itali, i dyshuari ka kërkuar qe me çdo kusht t’i fshihet nga evidenca që nuk është nën hetime. Ne e kemi lutur që t’i lejojë gjyqtarët të shkojnë në punë dhe më vonë do t’i kryhet rasti por ai nuk ka pranuar”, tha Astrit Dibra.

Ndërsa prokurori i Prokurorisë Themelore në Mitrovicë, Sahit Tmava tha për “KALLXO.com” i dyshuari është ndaluar në stacion policor dhe është në pritje të vendimit të gjykatës.