Arrestohet edhe i dyshuari i katërt

Sipas të përditshmes zvicerane “Le Nouvelliste” e duke iu referuar burimeve policore, pasditen e hershme të së hënës, është arrestuar edhe personi i katërt, i dyshuar për vrasjen e të riut shqiptar që ndodhi gjatë fundjavës, para diskotekës “Highlander” në Neuchatel.

Bëhet fjalë për një zviceran të moshës 19-vjeçare, me vendbanim në Ste-Croix (VD). Thika me të cilën është kryer vrasja, është gjetur të dielën në Neuchatel, kanë deklaruar nga Policia kantonale e Neuchatel-it. Tre të dyshuarit tjerë, ishin arrestuar midis së premtes dhe së shtunës në rrethinën e Yverdon-les-Bains (VD).

Bëhet fjalë për dy vëllezër kosovarë të moshës 22-, e 23-vjeçare. I dyshuari i tretë, gjithashtu është kosovar 22-vjeçar, pa status të rregulluar në Zvicër. Vrasja e shqiptarit nga Lugina e Preshevës kishte ndodhur për një zënkë me motive banale.