Arrestohen kontrabanduesit e artefakteve arkeologjike në Apolloni

Objektet prej bronzi, hekuri dhe qeramike u sekuestruan dhe materialet i kaluan Prokurorisë së Rrethit Gjyqësor Fier, për veprime të mëtejshme

Policia shqiptare ka bërë të ditur se e ka parandaluar kontrabandimin e 230 artefakteve arkeologjike nga Apollonia e lashtë dhe i ka arrestuar dy persona, raporton albinfo.ch.

Sektori i Narkotikëve dhe trafiqeve në bazë të hetimeve disa mujore ka çuar në arrestimin e dy shtetasve dhe shpalljen në kërkim të dy të tjerëve, të cilët gërmonin në Parkun Kombëtar të Apollonisë.

Policia e Fierit ka bërë të ditur se në sajë të operacionit “Apollonia” janë arrestuar Toni Fasko dhe Saimir Fasko nga Radostina e Fierit, të cilët në bashkëpunim edhe me dy shtetasit e tjerë të shpallur në kërkim, A.F dhe E.F, gërmonin në mënyrë të paligjshme në Parkun Kombëtar të Apollonisë prej nga ku kanë nxjerrë 230 objekte arkeologjike me qëllim trafikimin e tyre.

Objekte e llojit bronz, hekur dhe qeramikë u sekuestruan dhe materialet i kaluan Prokurorisë së Rrethit Gjyqësor Fier, për veprime të mëtejshme.

“Këta shtetas në bashkëpunim me njëri-tjetrin, për një periudhe të gjatë kohe në mënyre të paligjshme kanë gërmuar në parkun kombëtar të mbrojtur të “Apollonisë”, ku kanë nxjerrë rrethe 230 objekte arkeologjike si bronx, hekur dhe qeramike, të cilat pasi i grumbullonin në banesat e tyre i pregatisnin me qellim trafikimin e tyre”, thuhet në deklaratën e policisë së shtetit.