Arigona fiton lejen e qëndrimit në Austri

"Nuk do të besoja sikur të mos e kisha në dorë vizën me lejen e qëndrimit" thotë 20 vjeçarja e njohur për opinionin austriak

Arigona Zogaj: Të gjithëve na kujtohet ky emër. Rreth katër vite më parë, vajza shqiptare me këtë emër qe bërë personalitet numër një në opinionin austriak pasi që ishte fshehur nga autoritetet të cilat e kishin riatdhesuar familje e saj në Kosovë.

Nga vendi ku fshihej ajo kërcënonte se do të bënte vetëvrasje nëse do ta detyronin të kthehej. Më vonë, pasi qe dorëzuar, Arigona dhe familja e saj gjatë gjithë kohës ka qëndruar në shtyllat e gazetave dhe në mediet elektronike të Austrisë. Fati i tyre, do të ktheheshin apo do të mbeteshin në Austri kishte mbajtur mbërthyer këtë opinion për një kohë të gjatë.

Për fatin e Arigonës, madje ishin mbajtur edhe seanca të veçanta të Parlamentit Federal të Austrisë!

Sot, më në fund, Arigona ka marrë lejen e qëndrimit të përhershëm në Austri . “Nuk do të besoja sikur të mos e kisha në dorë vizën me lejen e qëndrimit” thotë 20 vjeçarja për portalin “Österreich”.

Sidoqoftë, ajo bashkë me familjen, e ka paguar shtrenjtë këtë vizë. Prindërit ndërkohë janë shkurorëzuar. Babai jeton në Maqedoni, dy vëllezërit, Albani dhe Alfredi punojnë si punëtorë me mëditje në Kosovë, e nëna ka pas vetes disa tentime për vetëvrasje.

Por, ndërkohë, nëna Nurija, e cila ka marrë më parë lejen e qëndrimit, punon si pastruese në Linz, ku jeton bashkë me Albinin 12 vjeçar dhe Albonën 13 vjeçe, të cilët vijojnë shkollimin.

Arigona ka mbaruar një shkollim të mesëm. Leja e qëndrimit duhet të vazhdohet dy herë nga dy vjet, ndërsa pas 5 vjetësh ajo kteheht në leje të përhershme.