Apostolova: Për liberalizimin mbeten dy kushtet

Shefja e Zyrës së Bashkimit Evropian, Nataliya Apostolova, ka vazhduar takimet me grupet parlamentare në Kuvendin e Kosovës.

Në takimin që ka pasur me përfaqësues të grupit parlamentar të Lidhjes Demokratike të Kosovës ajo tha se është e interesuar për pozitën e LDK-së si opozitë në Kuvend në trajtimin e çështjeve të rëndësishme për plotësimin e kritereve për liberalizimin e vizave, përcjell albinfo.ch.

Apostolova tha se asnjëherë nuk kanë thënë se kriteri për luftimin e korrupsionit është përmbushur, mirëpo vetëm se është bërë punë e mirë. Ajo më tej shtoi se BE-ja pret që proceset gjyqësore për luftimin e korrupsionit të përfundojnë me aktgjykime.

Ndërsa shefi i grupit parlamentar të LDK-së, Avdullah Hoti, tha se edhe pse janë opozitë në Kuvend, ata nuk do të bëjnë opozitë, siç ka bërë “Vetëvendosje” dhe, sipas tij, do të jenë bashkëpunues në proceset e rëndësishme për Kosovën. E Vjosa Osmani kërkoi nga Apostolova më shumë detaje lidhur me atë pse në kohën e qeverisjes së Isa Mustafës është thënë që kriteri për luftimin e korrupsionit është afër përfundimit, e tani është kthyer mbrapa.