Aplikacioni hekurudhor zviceran shet bileta për udhëtime ndërkombëtare

Tani për tani, ju mund të blini bileta për udhëtime brenda Zvicrës në aplikacionin celular të Hekurudhave Federale të Zvicrës (SBB), por ky opsion nuk është ende i disponueshëm për udhëtime ndërkombëtare. Kjo është gati të ndryshojë.

Nëse dëshironi të udhëtoni nga Zvicra në qytetet evropiane, mund t’i blini biletat tuaja nga faqja e internetit e SBB-së, ose në sportelet e zyrave fizike të SBB-së, të cilat, megjithatë, po bëhen gjithnjë e më të pakta në stacionet e trenit, shkruan The Local.

“Sistemi i prenotimeve për udhëtimet ndërkombëtare është “thembra jonë e Akilit”, pranoi në një intervistë CEO i kompanisë, Vincent Ducrot.

Si rezultat, shumë pasagjerë zviceranë shpesh blejnë biletat e tyre ndërkombëtare direkt nga faqet e internetit të kompanive të huaja hekurudhore.

Por, nga viti 2024, aplikacioni aktual SBB do t’i lejojë udhëtarët të blejnë bileta edhe për destinacione të huaja.

“Qëllimi ynë është të ofrojmë shitjen e biletave ndërkombëtare në aplikacion gjatë vitit të ardhshëm. Ekipet tona po punojnë shumë për këtë”, tha zëdhënësi i SBB, Jean-Philippe Schmidt, përcjell albinfo.ch.

Mediat zvicerane raportuan gjithashtu se përmirësime të mëtejshme priten vitin e ardhshëm.

Në veçanti, duhet të jetë e mundur të rezervoni një vend specifik për udhëtime ndërkombëtare.

Aktualisht, aplikacioni celular i lejon pasagjerët vetëm të zgjedhin preferencat, si p.sh. nëse duan të ulen pranë një dritareje ose pranë korridorit.

Megjithatë, një përditësim i sistemit të prenotimeve do t’u mundësonte udhëtarëve zviceranë që udhëtojnë në grupe të rezervojnë vendet krah për krah.

Përveç një aplikacioni të ri për biletat ndërkombëtare, udhëtarët në Zvicër do të mund të përfitojnë gjithashtu nga kartat e reja të udhëtimit / abonimet më të lira, duke filluar nga mesi i dhjetorit 2023, shkruan The Local.