Apel i Ambasadës amerikane për qytetarët e Kosovës: Vaksinohuni!

Ambasada e Shteteve të Bashkuar të Amerikës në Kosovë u ka bërë thirrje qytetarëve që të vaksinohen, pasi që numri i rasteve pozitive me COVID-19 është në rritje.

Ambasada amerikane, përmes një postimi në Facebook, ka thënë se vaksinat janë të sigurta dhe efektive.

“Me rritjen e numrave të rasteve të Kosovës, edhe nëse keni mbijetuar nga COVID19, është e rëndësishme që jeni të vaksinuar. Vaksinat janë të sigurta, efektive dhe ulin ndjeshëm mundësinë që ju ose një anëtar i familjes të përfundojë në spital”, thuhet në postimin e ambasadës.

Në Kosovë tashmë ka nisur programi i vaksinimit masiv kundër koronavirusit.

Në këtë vend ka vaksina të prodhuesve Pfizer/BioNTech dhe AstraZeenca.

Përgjatë së hënës ndonjërën nga këto vaksina e kanë marrë 10,534 persona.

Numri i personave të vaksinuar me të dyja dozat e vaksinave ka shkuar në 169,687, ndërsa shifra totale e vaksinave të dhëna është 498,858.

Ditëve të fundit është shënuar ngritje e rasteve të infektuarve më coronavirus. Sipas raportit të IKSHPK-së për 24 orët e fundit, në Kosovë janë regjistruar 263 raste pozitive me COVID-19.