Anije me mbi një mijë tonë ushqime drejt Gazës

Keystone EPA/MOHAMMED SABER

Një anije e ngarkuar me 1.200 tonë ushqime është nisur nga Qiproja dhe të martën ka mbërritur pranë portit izraelit të Ashdodit, në kuadër të përpjekjeve për të lehtësuar krizën humanitare në Rripin e Gazës.

Anija, e regjistruar në Panama, mbart 52 kontejnerë me furnizime ushqimore – përfshirë oriz, makarona, ushqim për foshnja dhe produkte të konservuara. Para nisjes, ndihmat u kontrolluan nga autoritetet izraelite në portin qipriot të Limasolit, prej nga anija u nis të hënën.

Rreth 700 tonë nga ky ngarkesë janë financuar nga Emiratet e Bashkuara Arabe përmes Fondit Amalthea, mekanizëm i krijuar vitin e kaluar për të koordinuar ndihmat detare për Gazën. Pjesa tjetër është siguruar nga Italia, Qeveria e Maltës, një urdhër katolik në këtë shtet dhe organizata humanitare kuvajtiane Al Salam.

Vetëm gjatë vitit të kaluar, Qiproja kishte dërguar rreth 22.000 tonë ndihma me anije drejt Gazës, përmes një projekti të organizuar nga bamirësia World Central Kitchen dhe ushtria amerikane. Megjithatë, në fund të korrikut 2024 ky mision u ndërpre për shkak të pasigurisë dhe kufizimeve të vendosura mbi sasinë e ndihmave që mund të shpërndaheshin