Anglia rezervon gjithë hotelin me 126 dhoma, e lë jashtë Kosovën

(AP Photo/Visar Kryeziu, FILE)

Përfaqësueses së Kosovës në futboll mund t’i prishet rehatia për ndeshjen e 17 nëntorit.

Ajo nuk do të mund të akomodohet në hotelin që e shfrytëzon tash e sa vjet – “Emerald”, që është në periferi të Prishtinës, kur të vijë koha të ndeshet me Anglinë, në kuadër të eliminatoreve për “Euro2020”.

Kjo pasi Federata e Futbollit e Anglisë (FA) tashmë e ka rezervuar hotelin për ditët sa do të qëndrojë në Prishtinë. Ndeshja i takon Grupit A dhe zhvillohet më 17 nëntor në stadiumin “Fadil Vokrri”, shkruan Koha Ditore.

Rezervimi nga Federata angleze është konfirmuar edhe nga hoteli në fjalë. Ata kanë thënë se 126 dhomat janë të zëna për kohën sa do të qëndrojë Anglia, përcjell albinfo.ch.

 Federata angleze ka bërë rezervimin tetë muaj para zhvillimit të këtij dueli dhe ka kërkuar që asnjë mysafir të mos jetë i pranishëm në hotel gjatë kohës së qëndrimit të përfaqësueses së saj.