Andi Zeqiri sërish nuk ftohet nga Zvicra

Zvicra me tre shqiptarë në Evropian, Zeqiri mbetet jashtë

Mësohet se tre shqiptarë do ta përfaqësojnë Zvicrën në “Euro 2024”. Të premten pasdite selektori i Zvicrës, Murat Yakin vendosi për listën përfundimtare prej 26 lojtarësh. Në stërvitjen e së premtes u paraqitën 27 lojtarë, ndërsa lojtari i fundit i hequr nga lista është sulmuesi shqiptar, Andi Zeqiri. 24-vjeçari luan për Genkun në Belgjikë, ndërsa për Zvicrën i ka 11 paraqitje. Në konkurrencë me Zeqirin ishte Ardon Jashari. Yakini ka preferuar Jasharin para Andi Zeqirit, përcjell albinfo.ch.

Shumë më herët vendin e sigurt te “helvetikët” e kanë pasur Granit Xhaka e Xherdan Shaqiri, dy prej lojtarëve kryesorë të Zvicrës.

Të mërkurën u eliminuan edhe Uran Bislimi e Albian Hajdari. Ata ishin në listën e gjerë, por mbetën jashtë ekipit pa u grumbulluar fare.

“Andi e bëri vendimin të vështirë për ne. Së fundi ai ofroi paraqitje shumë të mira. Ditët e fundit në kampin përgatitor kanë treguar që gara është e fortë në sulm. Por lojtarë të tjerë kemi preferuar”, ka thënë selektori i Zvicrës, Murat Yakin.

Sipas njoftimit të federatës zvicerane, Zeqiri tani është në listën e pritjes. Nëse një lojtar lëndohet, ai mund të zëvendësohet deri një ditë para ndeshjes së parë.

Zvicra të shtunën luan miqësore me Austrinë e më pas udhëton për në Gjermani.

“Kemi pasur fazë shumë të mirë përgatitore. Gara për 26 vendet ka kontribuar në stërvitje të intensitetit të lartë. Kushtet në St. Gallen ishin të jashtëzakonshme, përkundër motit të ligë. Disponimi në ekip është shumë i mirë. Jam shumë i kënaqur. Me këtë disponim duam të luajmë miqësoren ndaj Austrisë dhe më pas të udhëtojmë për në Stuttgart”, ka shtuar Yakin.

Më 15 qershor Zvicra e luan ndeshjen e parë në Evropian. Do të përballet me Hungarinë.

Lista e plotë:

---