Ambasadori Malaj, vizitë pune në Jura

Atë e pritën kryebashkiaku i Porrentruy Gérard Guenant, ministri në kantonin Jura, Charles Juillard si dhe bashkatdhetarë tanë

Me ftesë të autoriteteve komunale dhe kantonale të kantonit Jura si dhe të bashkësisë shqiptare, Ambasadori i Kosovës Naim Malaj, ka bërë një vizitë pune në qytetin Porrentruy të Kantonit Jura, bëhet e ditur në një komunikatë për shtyp të dërguar nga ambasada.

Në këtë takim merrnin pjesë kryebashkiaku i Porrentruy Gérard Guenant, ministri financave dhe ekonomisë së kantonit Jura,  Charles Juillard si dhe bashkatdhetarë tanë me banim në këtë kanton.

Kryebashkiaku Guenant, me këtë rast çmoi qytetarët shqiptarë të komunës së tij si punëtorë të zellshëm dhe pjesëmarrës aktiv në jetën shoqërore e politike.Edhe  Ministri Charles  Juillard  vlerësoi  kontributin e shqiptarëve te Juras në të gjitha fushat duke i quajtur ata si qytetarë të Juras, shokë dhe miq. “Paramendojeni ekipin kombëtar të futbollit të Zvicrës pa shqiptarët, ai thjesht nuk do të ekzistonte” theksoi,  Juillard.

Ambasadori Malaj falënderoi autoritetet kantonale të Juras për punën e mirë në integrimin e shqiptarëve, të cilët këto kohët e fundit janë kyçur edhe ne jetën politike duke përmendur zgjedhjen e para disa ditëve në këtë kanton të dy këshilltarëve komunalë   shqiptarë. Ishte konstatim i përbashkët se takime të tilla forcojnë edhe më shumë lidhjet mes Kosovës dhe Zvicrës, sidomos të bashkatdhetarëve tanë dhe autoriteteve zvicerane, thuhet veç tjerash në komunikatë.