Masa shtesë në Ambasadën në Bernë dhe konsullatat në Cyrih e Gjenevë

Njoftim nga Konsullata e Republikës së Kosovës në Cyrih e Gjenevë dhe Ambasada në Bernë

Shteti i Zvicrës po kalon një valë të dytë të Covid dhe numri i rasteve është rritur shumë. Sipas statistikave të fundit, brenda 72 orësh në Zvicër janë raportuar 21.926 infektime të reja.

Për shkak të kësaj rritjeje të vazhdueshme të numrit të infeksioneve nga COVID-19, Ambasada e Kosovës në Bernë dhe Konsullata e Republikës së Kosovës në Cyrih dhe Gjenevë ju njofton se janë të detyruar të marrin masa shtesë për të evituar përhapjen e virusit, në mbrojtjen e shëndetit tuaj dhe të stafit të Ambasadës, transmeton albinfo.ch.

Njoftimi:

Në ambientet e Ambasadës në Bernë dhe në Konsullatat tona në Gjenevë dhe Cyrih duhet të respektohen këto masa:

-Çdo person që hyn në ndërtesën e Ambasadës apo të njërës nga konsullatat në Gjenevë dhe Cyrih duhet të mbajë maskë dhe të mbajë distancën e duhur, siç është vendosur me rregullat e shtetit zviceran,

-Personat që kanë temperaturë mbi 37.5 gradë, luten të qëndrojnë në shtëpitë e tyre, sepse atyre nuk do t’u lejohet hyrja në objekt,

-Palët që nuk kanë nevoja urgjente, e që i takojnë grupit të rrezikuar nga pandemia etj., luten të shtyjnë terminet për kohë më të përshtatshme,

-Gjatë kësaj periudhe kohore nuk do të ofrohen shërbime konsullore për asnjë palë që nuk ka termin paraprak.

Në ditët në vijim do të shqyrtojmë gjendjen e sigurisë nga rreziku potencial i përhapjes së virusit COVID-19 dhe nëse është e nevojshme, do të merren masa shtesë sipas situatës së krijuar!

Ju falënderojmë për mirëkuptimin tuaj e ju urojmë shëndet e gjithë të mirat. /Albinfo.ch

---