Ambasada e Vatikanit, pritje lamtumirëse për Ambasadorin Malaj

Ambasadori i Vatikanit Mgr Diego Causero, në fjalën e tij e falënderoi Ambasadorin Malaj për punën e tij dhe i uroi një vazhdim të suksesshëm në karrierën e tij të mëtejshme profesionale

Ambasada e Vatikanit në Bernë organizoi të mërkurën, më 17 qershor një pritje për trupin diplomatik te akredituar në Bernë, për nder të largimit nga detyra të Ambasadorit të Kosovës në Bernë Z. Naim Malaj.

Për t’u përshëndetur me Ambasadorin Malaj dhe për ta falënderuar për bashkëpunimin gjatë këtyre viteve të fundit, ishin të pranishëm ambasadorë të shumtë nga vende si: Luksemburgu, Gjermania, Holanda, Suedia, Norvegjia, Spanja, Bullgaria, Hungaria, Kolumbia, Argjentina, Brazili, Bullgaria, Shqipëria, Pakistani, Tunizia etj., thuhet në një njoftim të Ambasadës së Kosovës në Bernë.

Mikpritësi dhe organizatori, Ambasadori i Vatikanit Mgr Diego Causero, në fjalën e tij përshëndetëse e falënderoi Ambasadorin Malaj për punën e tij dhe i uroi një vazhdim të gjatë e të suksesshëm në karrierën e tij të mëtejshme profesionale.

Më pas, fjalën e rastit në emër të trupit diplomatik e mbajti shkëlqesia e tij, Ambasadori i Holandës, Bart Twaalfhoven.

Ai iu drejtua miqësisht Zotit Malaj, si mikut të tij të afërt, duke e falënderuar për bashkëpunimin e shkëlqyeshëm që Zoti Malaj ka pasur me tërësinë e trupit diplomatik. Duke e cilësuar atë si “një ndër ambasadorët më të çmuar nga trupi diplomatik në Bernë”.

Më pas ai foli për rrugëtimin e veçantë të Zotit Malaj në shërbim të Kosovës dhe të diasporës së madhe në Zvicër.

Ambasadori holandez u shpreh i nderuar që ka pasur rastin të njohë ambasadorin Malaj si koleg dhe njeri, thuhet më tutje në njoftim.

Pas duartrokitjeve të shumta dhe dhuratave simbolike që iu dhuruan Ambasadorit Malaj dhe bashkëshortes së tij, Fjalën e mori Ambasadori Malaj i cili falënderoi kolegët e tij për bashkëpunimin e ngushtë dhe të vazhdueshëm.
Ambasadori Malaj, u shpreh me fjalë mirënjohëse për autoritetet zvicerane që me praninë e tyre të vazhdueshme i kanë dhënë një ndihmesë të madhe shtetit të Kosovës si dhe Ambasadës së Kosovës në Bernë.

Ceremonia përshëndetëse përcillej edhe nga televizioni shtetëror i Zvicrës romande i cili po përgatit një portret të ambasadorit të parë të Kosovës në Zvicër, thuhet në fund të njoftimit.