Ambasada e Shqipërisë në Bernë: Të festojmë së bashku Pavarësisë se Shqipërisë

Ambasada e Shqipërisë në Bernë u është drejtuar bashkatdhetarëve të Zvicrës kudo që ndodhen me urimet më të mira për Festën e Pavarësisë së Shqipërisë, përcjell albinfo.ch.

“Sot ne festojmë së bashku Shpalljen e Pavarësisë së Shqipërisë, festën kombëtare, 28 Nëntorin, dita në të cilën themeluesi i shtetit modern shqiptar, Ismail Qemali, ngriti Flamurin Kombëtar në Vlorë dhe shpalli pavarësinë e vendit 111 vjet më parë”.

Kjo ditë e shënuar për të gjithë ne ka qenë dhe mbetet simbol i bashkimit, unitetit, lidhjes, krenarisë, qëndresës dhe vendosmërisë së popullit shqiptar.

Ne u jemi mirënjohës gjithë atyre shqiptarëve patriotë për kontributin e tyre për liri dhe pavarësi, si dhe popujve dhe kombeve që mbështetën dhe përkrahën përpjekjet tona.

Ambasada e RSH-së në Bernë u shpreh mirënjohjen gjithashtu të gjithë shqiptarëve në Zvicër për kontributin e tyre për një imazh të një Shqipërie me vlera historike, kulturore, turistike, dhe me dëshirën që këto festa, të na shërbejnë si nxitje edhe më shumë për të përbashkuar tërë potencialin tonë mendor dhe veprues, me një dëshirë, një qëllim dhe nën një betim të një Shqipërie të integruar vizionare drejt një Evrope të bashkuar.