Alketa Selimaj, shqiptarja që kandidon në zgjedhjet lokale në Bruksel

Kandidate e listës së lëvizjes qytetare “Alternativa Humaniste”, anëtare e partisë së qendrës së djathtë CDH që mban 9 karrige në dhomën e përfaqësuesve dhe 4 në Senatin e Parlamentit Federal të Belgjikës; me përfaqësi parlamentare në të tre rajonet belge, si dhe një karrige në Parlamentin Evropian

“Këtë vit janë zgjedhjet lokale në Bruksel në 19 komuna dhe në një prej tyre, Koelkerbergu, unë do të jem kandidate”.

Alketa Selimaj, shqiptarja nga qyteti bregdetar i Vlorës, e treta në listën për Këshill Bashkiak, karrierën e ka nisur si aktiviste.

“Kam bërë pjesë në aktivitete të ndryshme si aktiviste në shoqata shqiptare ‘Alb-bel, Eagle Event’ që promovon imazhin e popullit dhe emigracionit shqiptar në Bruksel”, thotë ajo, raporton “abcnews”.

Jetën politike e nis si këshilltare, falë edukimit atje.

“Kam mbaruar drejtësi dhe e drejtë evropiane, këshilltare me presidenten e parlamentit frankofon të Brukselit dhe tani me ish-ministren e Brendshme”.

Propozimi për t’u bërë anëtare e listës “Alternativa humaniste” ishte për të oferta për të sjellë ndryshimin që kërkon, përcjell albinfo.ch.

“Është i njëjti sistem me të njëjtët drejtues. Ne kërkojmë diçka të re dhe pika jonë e parë e projektit është pjesëmarrja qytetare në vendimmarrje. Baza për një lokalitet vjen nga populli, ata e dinë çka duhet dhe ky është projekti ynë: T’i japim më shumë rëndësi qytetarëve”.

Pjesë e tyre është edhe komuniteti shqiptar atje, arsye e pjesëmarrjes së saj në këto zgjedhje.

“Konkretisht në zgjedhjet lokale duhet të kemi një listë që prezanton gjithë popullatën belge, sepse nuk i shikoj gjërat si i shikon një belg. Sot në Bruksel ka shumë vajza të tjera dhe është imazh pozitiv. Mendimi ynë si komunitet vihet në rëndësi tashme në Bruksel”.

Përfaqësimi i shqiptarëve në Bruksel shkon deri në nivel parlamentar dhe për Alketa Selimajn janë fillimisht ata përcjellësi i kulturës shqiptare në botë.

“Diaspora dhe emigracioni është imazhi i parë, jemi administratorët e parë të vendit. Komuniteti ynë është shumë i integruar dhe ka femra të tjera kandidate shqiptare. Në 19 komuna mund të jenë rreth 10-15 kandidatë shqiptarë që do jenë pjesë e votimeve. Kemi deputetin e parë, Ahmet Gjana, që është në parlamentin e Brukselit”.

Me modesti pret mundësinë e pjesëmarrjes direkte në këtë shërbim ndaj komunitetit dhe diasporës shqiptare, por fitoren nuk preferon ta quajë të garantuar, pavarësisht pozicionimit në vendin e tretë të listës së kandidates për kryebashkiake Veronik Lefrans.

“Jo e garantuar, por ka shumë shanse sepse vendi në listë ka influencë. Shpresoj, do jem pjesë e bashkisë së Koelkerbergut në rast fitoreje”.

Karrierën politike nuk e projekton në Shqipëri, por është rikthimi në rrënjët e aktivizimit, për Selimajn, rruga që mund ta shtyjë drejt vendit amë, Shqipëri.

“Aktualisht jam shumë mirë atje sepse mësoj shumë. Të jem pjesë e politikës këtu nuk e di, por në të ardhmen mund të kthehem si aktiviste për të ndryshuar diçka. Njerëzit që takoj këtu nuk më këshillojnë të kthehem, kjo tregon se qytetari shqiptar nuk është i plotësuar”.

Ndaj i këshillon, nisur nga eksperienca dhe bindja personale.

“Nëse duam të ndryshojmë diçka nuk mund ta bëjmë në kafene apo biseda mes nesh, ndryshimi vjen nga populli, edhe pse e vështirë është e mundur. Arsimin mjekësinë që janë më bazike apo administratën publike. Kjo mund të vij vetëm nga populli, këtë i këshilloj të rinjve në radhë të parë”.

Zgjedhjet në Bruksel do të mbahen të dielën e 14 tetorit dhe pritet të nxjerrin trupat e reja lokale për 19 komuna, mes të cilave me pak punë pritet të jetë pjesë edhe shqiptarja Alketa Selimaj.

---