Aktakuza për të dyshuarit për sulmin në Banjskë, BE: Presim përfundimin e procesit gjyqësor për të ndërmarr veprime

(KEYSTONE/Martin Ruetschi)

Pasi Prokuroria Speciale e Kosovës dje ka ngritur aktakuzë ndaj 45 të dyshuarve për sulmin e shtatorit të vitit të kaluar në Banjskë, zëdhënësi i Bashkimit Evropian, Peter Stano ka folur në lidhje me këtë temë.

Stano në një konferencë për media ka thënë se Bashkimi Evropian ka mirëpritur faktin që Prokuroria Speciale e Kosovës ka përfunduar hetimet, ndërsa u shpreh se presin përfundimin e procesit gjyqësor dhe atëherë do të jetë koha për përgjegjësi.

“Bashkimi Evropian e mirëpret faktin që Prokuroria Speciale e Kosovës ka përfunduar hetimin për sulmin në Banjskë dhe është ngritur aktakuzë… Bashkimi Evropian vazhdimisht ka përsëritur pritjet që të gjithë përgjegjësit dhe të përfshirët në këtë sulm brutal të mbahen përgjegjës. Tashmë ka nisur procesi gjyqësor dhe ne presim përfundimin e procesit”, ka thënë ai, transmeton albinfo.ch.

Ai ka deklaruar se presin që Serbia të bashkëpunojë në hetimet për sulmin në Banjskë.

“Kemi thënë atëherë në fund shtatorit të vitit të kaluar se ky sulm përbën një eskalim të qartë e paprecedentë…dhe do të ketë pasoja. Kur gjykata në Kosovë të vendosë kush është fajtor, kush është përgjegjës ose i pafajshëm, atëherë do të jetë koha për përgjegjësi”, ka thënë ndër të tjera Stano teksa shtoi se do të presin përfundimin e procesit gjyqësor për të ndërmarr veprime.