Aksion i gjerë i Policisë, shumë të arrestuar në Shtërpcë, ish-zyrtarë të lartë të komunës

Foto ilustrim

Policia e Kosovës ka nisur të martën në mëngjes një aksion të gjerë në rajonin e Ferizajt dhe të Prishtinës. Mësohet se aksioni ka lidhje me veprat penale të korrupsionit me ndërtimet në Brezovicë.

Janë bastisur disa lokacione deri tash, ka konfirmuar kryeprokurori i Prokurorisë Themelore të Ferizajt, Shukri Jashari.

“Është duke u zhvilluar një aksion në disa lokacione. Ka të bëjë për keqpërdorim të detyrës zyrtare, pra ryshfet dhe ndërtime pa leje”, ka deklaruar Jashari për KP.

Ish-kryetari i Komunës së Shtërpcës, drejtori i Urbanizimit, disa zyrtarë të tjerë dhe pronarë firmash janë arrestuar të martën në aksionin e Policisë, për shkak të dyshimit për ryshfet e keqpërdorim të detyrës zyrtare, ka njoftuar Prokuroria Themelore në Ferizaj.

Siç ka njoftuar kjo prokurori, aksioni është duke vazhduar në këtë komunë.

Lidhur me këtë aksion deri më tani me urdhër të Prokurorit të Shtetit janë arrestuar dhjetë persona të dyshuar, në mesin e tyre edhe ish-kryetari i Komunës së Shtërpcës, drejtori i Urbanizmit, disa zyrtarë të tjerë dhe pronarë të firmave, për shkak të dyshimit të veprave penale “Marrja e ryshfetit”, “Dhënia e ryshfetit” dhe “Keqpërdorimi i pozitës apo autoritetit zyrtar” të Kodit Penal të Republikës së Kosovës (KPRK)