Adoleshenti kosovar, i dyshuar për ISIS, e quan veten “Bombarduesi”

15-vjeçari zviceran me prejardhje kurde dhe 16-vjeçari, shtetas italian me rrënjë kosovare, të arrestuar në Schaffhausen, akuzohen se kanë planifikuar një sulm

Pas arrestimit të dy të rinjve në Schaffhausen, të dyshuar si bashkëpunëtorë të rrjetit terroist ISIS, dalin në dritë detaje të reja – përfshirë edhe aktivitetet e tyre në internet.

Dy adoleshentë janë arrestuar në Kantonin e Schaffhausenit gjatë fundjavës së Pashkëve, transmeton albinfo.ch. 15-vjeçari zviceran me prejardhje kurde dhe 16-vjeçari italian (me prejardhje kosovare) akuzohen se kanë planifikuar një sulm.

Tani ka informacione të reja për dy të rinjtë nga qyteza Neuhausen am Rheinfall. Siç raporton “CH Media”, italiani në veçanti ka qenë mjaft aktiv në rrjetet sociale. Me sa duket, ai ka mbajtur shumë llogari në ato rrjete.

Në Instagram adoleshenti italian e quante veten, ndër të tjera, “Il Bomber di Instagram” (italisht, “Bombarduesi i Instagramit”). Nga vjen saktësisht ky emër është e paqartë.

Sipas raportit, ka mundësi që të ketë lidhje me hobin e tij, lojërat në internet (Game). Thuhet se ai ka ngarkuar një video lojërash në YouTube.

Në çdo rast, duket se emri nuk ka lidhje me ndonjë aktivitet terrorist. Fjala “Bomber” përdoret në gjuhë të folur në mënyra të ndryshme, në italishte, transmeton albinfo.ch. Ndër të tjera, përdoret për të përshkruar një sulmues në futboll. Përdoret gjithashtu shpesh në zhargonin e të rinjve, ngjashëm me emërtimin e njohur “cool”.

Parë nga ky aspekt, emri tingëllon më spektakular në kontekstin aktual sesa duhet të jetë në të vërtetë.

16-vjeçari është rritur në Itali, por ka rrënjë kosovare. Ai, në rrjetet sociale shihet në foto me flamuj të Kosovës apo Shqipërisë dhe po ashtu ka pozuar edhe me shqiponjën dykrenare.

Ndërkaq, më pak dihet për 15-vjeçarin zviceran që u arrestua në Schaffhausen. Thuhet se ai ka rrënjë kurdo-turke dhe ishte aktiv edhe si gamer (lojëra në internet).

Ajo që bie në sy është se vrasësi me thikë i Cyrihut që ka sulmuar disa javë më parë një hebre ortodoks konsiderohej edhe ai “gamer”, përcjell albinfo.ch. Sipas raportit, kjo nuk është rastësi. Sepse IS po kërkon posaçërisht për talentë të rinj në platformat e lojërave online.

 

---