ADA austriake, 900 vende pune në bujqësinë kosovare

Geositz, shef i Zyrës së ADA-s në Prishtinë: "Ne kemi kontribuuar në krijimin e rreth 900 vendeve të punës. Kjo është realizuar përmes ngritjes së kopshteve më cilësore me xhama dhe zgjerimit të kultivimit të bagëtisë"

Christian Geositz udhëheqës i Zyrës Austriake të Ndihmës për Zhvillim në Prishtinë gjegjësisht agjencisë ADA (Austrian Development Agency), për portalin salzburg.com thotë se kjo agjenci deri më tash ka hapur 900 vende pune në Kosovë.

“Të ardhurat mesatare në Kosovë janë në mes 250 dhe 300 euro ndërsa çmimet e artikujve ushqimorë afërsisht sikur në Austri. Shkalla e papunësisë sillet në mes 30 dhe 40%. Geositz në Kosovë punon nga viti 2009 dhe detyrë kryesore e zyrës që udhëheq ai është të ndikojë në gjallërimin e ekonomisë vendore. Kjo bëhet duke filluar nga projektet në bujqësi e deri te ato për lokacionet e biznesit.

Geositz thotë se “ADA financon projekte, krijon lidhje dhe është në kontakt të ngushtë me politikën e këtushme”. Por agjencia kontribuon edhe në zhvillimin e cilësisë së universiteteve kosovare.

Në përgjithësi ADA investon në Kosovë mesatarisht nga 2.5 milionë euro në vit dhe është e pranishme para së gjithash në bujqësi. Suksesi i fundit i Geositz-it, shkruan salzburg.com duke e cituar atë: “Ne kemi kontribuuar në krijimin e rreth 900 vendeve të punës”. Kjo është realizuar përmes ngritjes së kopshteve më cilësore me xhama dhe zhvillimit të kultivimit të bagëtive.

Ai është krenar edhe me faktin se përmes njërit nga projektet e tij në Kosovë janë prodhuar vezët e para bio.