Abbott përshëndet qytetarët e Kosovës me video-mesazhin e fundit si ambasador i Britanisë së Madhe

Ambasadori i Britanisë së Madhe në Kosovë, Nicholas Abbott në përfundim të mandatit të tij në Kosovë, përmes një video-mesazhi ju është drejtuar qytetarëve të Kosovës, ku u shpreh se ky është vend i veçantë dhe meriton sukses, transmeton albinfo.ch.

“Koha ime si ambasador britanik në Kosovë ka marrë fund. Mirëpritja e ngrohtë e popullit kosovar te një ambasador britanik e ka bërë punën dhe jetesën këtu ndryshe nga çdo post tjetër që kam pasur. Ky është një vend i veçantë që meriton sukses”, u shpreh ai.

Tutje në mesazhin e tij të fundit si ambassador ai i ka ftuar liderët vendorë që të krijojnë një vizion modern për Kosovën demokratike.

“Konteksti ndërkombëtar mbetet një sfidë. Unë nuk kam mjet të lehtë për të ofruar zgjidhje, por i ftoj këta që e udhëheqin Kosovën të krijojnë një vizion modern, të shteti demokratik që mbështet, inkurajon dhe i mbron qytetarët e vet”, ka thënë ai.

Video-mesazhin e tij, Abbott e ka përmbyllur duke lexuar poezinë “Mëmëdhe”, të Andon Zako Çajupit, për të cilën tha se është e preferuara e tij.

Linqet e video-mesazheve:

https://www.facebook.com/nicholasabbott2019/videos/1139852050506033

https://www.facebook.com/nicholasabbott2019/videos/6952372868204855